Stórmeistarinn Guðmundur Kjartansson (2450) er meðal 41 keppenda sem hefur fullt hús eftir tvær umferðir á EM einstaklinga í Terme Catez í Slóveníu. Í gær vann hann danska stórmeistarann Jesper Thybo Söndergaard (2590) í stöðubaráttuskák. Stórmeistarinn Hannes Hlífar Stefánsson (2520) tapaði fyrir úkraínska stórmeistaranum Andrei Voloktitin (2687) og hefur 1 vinning.
Þriðja umferð fer fram í dag. Gummi mætir tékkneska stórmeistaranum Peter Michalik (2585) og Hannes teflir við slóvensku skákkonuna Zala Urh (2307), sem er stórmeistari kvenna.
Alls taka 317 skákmenn frá 40 löndum þátt í mótinu. Þar af eru 114 stórmeistarar. 20 efstu sætin gefa keppnisrétt á heimsbikarmótinu í skák á næsta ári. Hannes er nr. 94 í stigaröð keppenda en Guðmundur er nr. 133.
