Fréttir

Jón Kristinn og Dagur Ragnarsson áfram í 8-manna úrslit á Síminn Invitational

Eftir

8. febrúar, 2026

211

Sextán manna úrslitum Síminn Invitational í netskák lauk nú í kvöld. Þeir Jón Kristinn Þorgeirsson og Dagur Ragnarsson fóru báðir áfram úr viðureignum kvöldsins, unnu báðir 4-1 sigra.

Jón Kristinn mætti Sigurði Daða Sigfússyni í fyrra einvígi kvöldsins. Jokkó byrjaði betur og komst í 3-0 áður en Daði komst á blað. Jokkó var klár í bátana í seinni hálfleiknum og kláraði einvígið 4-1 eins og áður sagði. Sterk frammistaða hjá Jóni.

Í seinna einvíginu hafði Dagur Ragnarsson betur gegn Braga Þorfinnssyni. Bragi fékk færi á að jafna leikinn í krítískri skák í stöðunni 1,5-0,5 fyrir Dag. Dagur sneri hinsvegar dæminu við og komst í 2,5-0,5. Dagur tefldi af öryggis í næstu tveimur skákum og 4-1 sigur hans ekki í hættu í seinni hálfleiknum.

Fínn dagur hjá Degi sem var fyrr í dag krýndur Skákmeistari Reykjavíkur!

Stutt hlé verður nú á útsendingum en 8-manna úrslit halda áfram 22. febrúar næstkomandi. Viðureignir 8-manna úrslita eru:

Dagur – Vignir
Ingvar Þór – Bárður
Björn – Símon
Jón Kristinn – Aleksandr Domalchuk-Jonasson

Skákskýringar í kvöld voru í umsjón Ingvars Þór Jóhannessonar og Björns Ívar Karlssonar.

https://www.youtube.com/watch?v=I_sw5vuTh0c

Harpa Ingólfsdóttir Gígja er efst í Draumaliðsdeildinni. Staðan í Draumaliðsdeildinni.Mótið er í umsjón Rafíþróttasambands Íslands í nánu samstarfi við Skáksamband Íslands. Beinar útsendingar verða á Símanum Sport. Aðrir styrktaraðilar eru Collab, Ljósleiðarinnn og Lengjan.

Hægt er að fylgjast með á Sjónvarpi Símans eða á YouTube rás RÍSÍ eða Twitch Rási RÍSÍ

Í úrslitakeppninni verða tefld sex skáka einvígi – sá vinnur sem fyrr fær 3½ vinning. Verði jafnt verður teflt til þrautar. Í úrslitum verður 10 skáka einvígi – sá vinnur sem fyrr fær 5½ vinning.

Verðlaun í aðalkeppninni