Suðurlandsmót grunnskólasveita fór fram í Félagsheimilinu á Flúðum þriðjudaginn 3. mars.
Mótið var tvískipt en teflt var í yngri flokki (1.-7. bekkur) og eldri flokki (8.-10. bekkur).
Alls voru 25 sveitir skráðar til leiks, samtals rúmlega 100 keppendur!
Talsverður skákáhugi er á Suðurlandi um þessar mundir. Skákæfingar og kennsla er í fjölda grunnskóla og teflt er á göngum skólanna í lausum stundum. Kennarar kvarta yfir því lúxusvandamáli að eiga erfitt með að ná nemendum inn í kennslustundir sem sitji einbeittir yfir taflmennsku í frímínútum!
Tefldar voru fimm umferðir á Suðurlandsmótinu með umhugsunartímanum 5+2 á hvern keppanda.
Í yngri flokki voru heimamenn í Flúðaskóla sterkastir og enduðu efstir. Flóaskóli og Kerhólsskóli urðu í næstu sætum.
Í eldri flokki var Sunnulækjarskóli frá Selfossi mjög öflugur og tók bæði gull og silfur. Vallaskóli, einnig frá Selfossi, tók bronsið.
Sigursveitir mótsins hlutu, auk verðlaunagripanna, bókaverðlaun frá Skáksambandi Íslands.
Mótsstjóri var Björn Ívar Karlsson skólastjóri Skákskóla Íslands.
