Atskákmót hjá TR í kvöld. Tefldar eru fimm skákir og tímamörkin eru 10 mínútur á skákina að viðbættum 5 sekúndum á hvern leik. Teflt er í einum flokki. Mótin eru öllum opin og reiknuð til alþjóðlegra atskákstiga. Teflt er í félagsheimili TR, Faxafeni 12 og taflmennskan hefst stundvíslega klukkan 19:30. Það þarf ekki að skrá sig fyrirfram, nóg að mæta á staðinn. Umsjón með mótunum hafa þeir Eiríkur K. Björnsson og Gauti Páll Jónsson. Þátttökugjald er 500kr. en frítt er fyrir 17 ára og yngri.
Veitt eru verðlaun, 3000 króna inneign í Skákbúðina, fyrir sigurvegara mótsins, og fyrir bestan árangur miðað við eigin stig (rating performance).
——
Kristófer Orri Guðmundsson hlaut fullt hús vinninga á Þriðjudagsmótinu þann 5. júlí síðastliðinn. Kristófer hefur verið afar sigursæll á Þriðjudagsmótunum í vetur, en hann einbeitir sér að því að vinna menn yfir 2000 stigum. Reyndar einbeitir hann sér svo vel að því að innan skamms verður hann eflaust í þeim hópi! Í öðru til þriðja sæti með fjóra vinninga urðu þeir Brynjar Bjarkason og Kjartan Maack. Skákstjóri þurfti að láta sjötta sæti duga eftir snubbótta byrjun.
Þetta var með betur sóttu sumarmótunum, 25 manns! Samkvæmt afar nákvæmum útreikningum skákstjóranna Eiríks og Gauta Páls, þá er það með tuttugastaogfimmta þáttakandum sem að það gerist þörf á kaffikönnu númer tvö. Við munum það næst! Þónokkrir nýliðar mættu til leiks í bland við reglulega gesti. Árangursverðlaunin hlaut Snorri Kristjánsson, en hann er stigalaus og fékk þrjá vinninga og með árangur upp á rúm 1500 stig.
Öll úrslit mótsins má sjá á chess-results.
Enn er í gildi sumardagskrá, teflt annan hvern þriðjudag!
