Hilmir Freyr Heimisson er algjörlega „á eldi“ á opna mótinu í Prag og hefur nú 5,5 vinning af 6 eftir enn einn sigurinn. Hannes Hlífar Stefánsson er einnig í góðum gír á Tene og vann í dag og hefur 3,5 vinning af 4, hefur unnið allar tefldar skákir sínar.
Hilmir gjörsamlega yfirspilaði andstæðing sinn í dag, FIDE meistarann Rao Sharan (2248) frá Indlandi. Bjartsýn framrás í miðtaflinu, 22.f4? tryggðu Hilmi stöðuyfirburði og frumkvæði sem hann lét aldrei af hendi.
Hilmir hefur eins og áður sagði 5,5 vinninga 6. Hilmir fær hvítt á indverska stórmeistarann Deep Sengupta (2473) í sjöundu umferðinni. Vonandi verður sá indverski ekki of djúpur!
Bárður Örn Birkisson (2179) er orðinn næst efstur Íslendingana með 4,5 vinning. Hann lagði Salvador Eduardo Serrano (2283) frá Tékklandi í umferð dagsins. Þriðji sigur hans í röð! Bárður mætir indverska alþjóðlega meistaranum Upadhyaya Anwesh (2353) í sjöundu umferðinni.
Aleksandr Domalchuk-Jonasson gerði jafntefli við hollenska alþjóðlega meistarann Gerard Welling (2253) í dag og hefur 4 vinninga.
Davíð Kolka (1959) og Aron Þór Mai (2077) hafa 3,5 vinning eftir jafntefli í sínum viðureignum.
Alexander Oliver Mai (2128) laut í dúk í dag og hefur 3 vinninga eins og Björn Hólm Birkisson (2121) sem gerði jafntefli í sinni skák. Jóhann H. Ragnarsson (1908) laut einnig í dúk og hefur 2 vinninga.
- Heimasíða mótsins
- Chess-Results
- Beinar útsendingar (hefjast flestar kl. 13)
Jóhann Hjartarson (2454) tók yfirsetu í fjórðu umferðinni í Dortmund og hefur 0,5 vinninga eftir umferðirnar fjórar
Hannes Hlífar Stefánsson virðist vera í góðum gír og sáttur við sólina á Tene. Hann lagði indverska alþjóðlega meistararann Bala Chandra Prasad Dhulipalla (2448) með svörtu mönnunum. Hannes hefur unnið allar þrjár tefldar skákir sínar og hefur 3,5 vinning af 4 mögulegum.
Pörun liggur ekki fyrir þegar þetta er skrifað en Hannes ætti að fá stórmeistara í 5. umferðinni.
