Hannes hlutskarpastur á fyrsta mótinu í Le Kock mótaröðinni

Vel yfir 50 skákmenn mættu til leiks á Le Kock á Tryggvagötu. Fjölmargir skráðu sig til leiks en mættu ekki sem gerir mótahald almennt erfiðara í skipulagningu og framkvæmd og mættu skákmenn taka það til sín að láta vita af sér ef hætt er við mætingu eftir að hafa skráð sig til leiks! Á endanum reyndist fjöldinn nokkuð þægilegur fyrir rýmið sem var í boði en hætt er við að þegar að líður á mótaröðina komist færri að en vilja!

Stórmeistarinn Hannes Hlífar Stefánsson tapaði snemma gegn Benedikt Briem en eftir það var eins og hann setti í einhvern fluggír! Sigur hans gegni Birni í 7. umferð var lykilskák!

Dagur Ragnarsson reyndist einnig í ágætis gír en viðureign hans og Hannesar í 8. umferð var algjör lykilviðureign. Hannes hafði betur með svörtu og gat leyft sér að gera jafntefli við Braga í lokaumferðinni til að tryggja sigurinn.

Skemmtilegt mót að baki en mikil barátta eftir í þessari skemmtilegu mótaröð. Skak.is hvetur skákmenn til að taka þátt, bæði til að styðja þetta frábæra framtak hjá mótsaðilum og styrktaraðilum og líka bara af því að maturinn er fjandi góður á Le Kock!

Lokastaðan – efstu menn:

1. GM Hannes Hlífar Stefánsson – 7,5 vinningar
   60,000kr + Gjafakarfa frá Innnes

   

2. IM Björn Þorfinnsson – 7 vinningar
   40,000kr + Gjafakarfa frá Innnes
   
   

3. IM Dagur Ragnarsson – 7 vinningar
   20,000kr + Gjafakarfa frá Innnes
   

U2000 Verðlaun

Roberto Eduardo Osorio Ferrer vann þessi verðlaun! Roberto hefur verið einn af kjölfestum í mætingu á þriðjudags- og fimmtudagsmót Taflfélags Reykjavíkur og gaman að sjá hann uppskera eins og hann sáir!

Efsti konan

Iðunn Helgadóttir er nýbúin að vinna sinn annan Norðurlandameistaratitil kvenna og hún hafði betur á oddastigum gegn stallsystur hennar í WCM klúbbnum, Guðrúnu Fanney Briem.

Efsta konan: 10,000kr gjafabréf á Le kock og Deig + Gjafakarfa frá Innnes

Efsti stigalausi

Daníel Hákon Friðgeirsson stóð sig vel. Hann er bróðir Dags Andra Friðgeirssonar sem er ansi lunkinn á svellinu í hraðskákinni!

Stig í mótaröðinni eftir fyrsta mót

1. GM Hannes Stefánsson – 12 stig
2. IM Björn Þorfinnsson – 10 stig
3. IM Dagur Ragnarsson – 8 stig
4. GM Bragi Þorfinnsson – 7 stig
5. FM Bárður Örn Birkisson – 6 stig
6. FM Simon Þórhallsson – 5 stig
7. FM Sigurbjörn Björnsson – 4 stig
8. FM Róbert Lagerman – 3 stig
9. CM Björn Holm Birkisson – 2 stig
10. Benedikt Briem – 1 stig

➕ Stigabreytingar:

• Gylfi Þorsteinn Gunnlaugsson: +70,4

• Theódór Eiríksson: +70,4

• FM Bárður Örn Birkisson: +35,8

Hægt er að skoða allar skákir og einstök úrslit á Chess-Results.

Myndasería frá fyrsta mótinu!