Fjórir skákmenn hafa fullt hús að loknum tvöföldum keppnisdegi á opna Íslandsmótinu í skák – 100 ára afmælismóti Skáksambands Íslands sem fram fer á Blönduósi. Þeir Vignir Vatnar Stefánsson, Aleksandr Domalchuk-Jonasson, Hannes Hlífar Stefánsson og Bárður Örn Birkisson unnu allir sínar skákir í dag og mætast innbyrðis í fjórðu umferð á Þjóðhátíðardeginum.
Þessi langi keppnisdagur hófst með morgunumferð. Stigahæsti skákmaður Íslands, Vignir Vatnar Stefánsson, mætti þar búlgarskri landsliðskonu, Gergönu Pechövu.
Vignir vann nokkuð góðan tæknilegan sigur. Eftir stöðubaráttu í miðtaflinu náði Vignir valdi á c4-reitnum í herbúðum hvíts, plantaði þar riddara og fékk í kjölfarið óþægilegan frelsingja á c-línunni. Næstu leikir snerust algjörlega um þetta peð og Vignir náði að nota peðið sem hálfgerða tálbeitu til að plokka hvert peðið af fætur öðrum af andstæðingi sínum.
Á sama tíma minnti Hannes Hlífar á sig með kraftataflmennsku gegn Lenku. Tveir margfaldir Íslandsmeistarar en Hannes hafði hvítt og Lenka virtist brenna skipin í þetta skiptið og það gekk einfaldlega ekki upp.
Ein skemmtilegasta skák umferðinnar var bylta þeirra Stefáns Steingríms og Björns Þorfinnssonar eins og ritstjórnin hafði í raun spáð! Stefán var vel undirbúinn en virtist þó víxla leikjum í byrjuninni. Stefán náði fljótlega að blása til sóknar og stóð ansi vel en Björn var úrræðagóður í vörninni og spriklinu og náði að lokum að nýta sér tímahrak andstæðingsins til að snúa taflinu sér í hag.
Guðrún Fanney Briem hélt jafntefli gegn Gunnari Erik en átti færi á einum stað til að fylgja eftir glimrandi byrjun úr fyrstu umferðinni. Aleksandr Domalchuk-Jonasson tefldi sannfærandi með svörtu sem og Sigurbjörn Björnsson.
Í seinni umferð dagsins, þeirri þriðju var komið að alvöru titilhafa viðureignum!
Vignir lagði Hilmi að velli. Þessir þekkja hvorn annan ansi vel og hafði það gríðarleg áhrif á ákvarðanatöku og tímanotkun strax í byrjun. Hilmir virtist vera fyrri til að hverfa frá sínum „leik“ og niðurstaðan varð auðveldari sigur fyrir Vigni heldur en flestir áttu von á.
Aleksandr Domalchuk-Jonasson tefldi mjög þétt og vann stílhreinan tæknisigur gegn Ivan Schitco. Lærdómsrík skák hjá Sasha þar sem yfirburðir biskups gegn riddara í endatafli með peð á báðum vængjum komu vel í ljós!
Hannes tefldi aftur af fítonskrafti og virðist einhvern veginn fá eitthvað „Íslandsmóts-aura“ á köflum og teflir eiginlega aldrei betur en á þessum mótum!
Síðastur til að slást í hópinn með fullt hús var svo Bárður Örn Birkisson sem lagði Björn Þorfinnsson í sveiflukenndri skák. Báðir fengu góða möguleika en Bárður var naskari í þetta skiptið.
Fjórir því með fullt hús að loknum þremur umferðum:
Í fjórðu umferðinni á Þjóðhátíðardaginn mætast á efstu borðum:
Samantekt Björns og Ingvars:
Myndasería frá öðrum keppnidegi: (2. og 3. umferð)
- Beinar útsendingar á lichess (15 mínútna töf)
- Mótið á chess-results
