Annar keppnisdagur Norðurlandamótsins í skólaskák í Finnlandi fór fram í dag, þegar tefldar voru tvær umferðir.
Hvaleyrarskóli og Rimaskóli tefla á mótinu sem fram fer í Helsinki dagana 12.-14. september.
Sveit Hvaleyrarskóla (U17):
- Tristan Nash Alguno Openia
- Milosz Úlfur Olszeski
- Kristófer Árni Egilsson
- Katrín Ósk Tómasdóttir
- Emilía Klara Tómasdóttir
Skáksveit Hvaleyrarskóla fékk tvær harðar sveitir í dag og varð sveitin úr Hafnarfirði að sætta sig við tvö 0-4 töp. Liðsmenn fengu oft á tíðum ágætar stöður eftir byrjunina en það örlaði á óskynsamlegri tímanotkun. Vænlegar stöður urðu því fórnarlömb fljótfærni sem hinir efnilegu krakkar úr Hvaleyrarskóla læra af. Sveitin á mikið inni og með skynsamlegri nálgun munu vinningar detta inn á lokadeginum. Hvaleyrarskóli er í sjötta og neðsta sæti eftir fjórar umferðir.
Sveit Rimaskóla (U13):
- Tristan Fannar Jónsson
- Emilía Embla B. Berglindardóttir
- Sigrún Tara Sigurðardóttir
- Emilía Sigurðardóttir
- Tara Líf Ingadóttir
Skáksveit Rimaskóla hóf daginn eins og Hvaleyrarskóli, með 0-4 tapi, gegn sterkri sveit. Í þriðju umferð gerði svo sveitin 2-2 jafntefli gegn Giersings realskole frá Danmörku. Rimaskóli er í fjórða sæti fyrir lokadaginn og á möguleika á baráttu um verðlaunasæti með góðum úrslitum í lokaumferðunum.
Sigrún Tara Sigurðardóttir tefldi skák dagsins á 3. borði fyrir Rimaskóla gegn Benjamin Tursic sem er rúmlega 200 skákstigum hærri en hún. Yfirveguð taflmennska og vönduð tækni skilaði góðum sigri.
Tímamörk eru 90 mínútur plús 30 sek og er dagskráin þétt!
Umferð 1 föstudag kl 19:00
Umferð 2 laugardag kl 09:00
Umferð 3 laugardag kl 15:00
Umferð 4 sunnudag kl 09:00
Umferð 5 sunnudag kl 14:00
Liðstjórar eru Ægir Magnússon frá Hvaleyrarskóla og Helgi Árnason frá Rimaskóla
Þjálfari er skólastjóri Skákskólans Björn Ívar Karlsson.
Lokaumferðirnar hefjast kl. 6:00 og 11:00 að íslenskum tíma.
