Skákum dagsins á skákþinginu er nú lokið. Í A-flokki beindist athylgin helst að skák þeirra Andra Freys og Rúnars, sem segja mátti að væri úrslitaskákin í baráttunni um meistarartitilinn, enda höfðu báðir keppendur unnið allar sínar skákir og í raun stungið keppinauta sína af. Rúnar stendur því með pálmann í höndunum; þeir félagar eru reyndar jafnir að vinningum, en Rúnar á óteflda skák við Stefán til góða.
Úrslit í A-flokki
- Andri-Rúnar 0-1
- Gunnlaugur-Karl 0-1
- Eymundur-Sigurður 1/2
- Stefán-Hjörleifur 1-0
Ólíklegt er að nokkur komist upp á milli fráfarandi meistara (Andra) og meistara ársins þar á undan (Rúnars), en flesti hinna keppendanna eiga enn möguleika á þriðja sætinu, þótt líklega standi Stefán þar best að vígi.
B-flokkur:
Í B-flokki halda Markús og Tobias forystunni og bendir margt til þess að þeir komi jafnir í mark. Tobias vann toppslaginn við Mikael eftir harðar sviptingar. Aðrar skákir voru tíðindaminni.
Úrslit í B-flokki:
- Brimir-Markús 0-1
- Tobias-Mikael 1-0
- Sigþór-Jóhann 0-1
- Alexía-Jökull Máni 0-1
- Emil-Gunnar Logi frestað
Forystusauðirnir hafa nú 6,5 vinning eftir sjö umferðir og eru í harðri baráttu um sigurinn. Mikael kemur næstur með 5 vinninga og Sigþór hefur 4.
Næsta umferð í báðum flokkum verður á sunnudag og hefst kl. 13. Öll úrslit, stöðuna og næstu viðureignir má finna á chess-results.
