Það ríkir mikið fjör við Selvatn. Myndskreyting: ESE

SKÁKDEILD KR efnir til sinnar árlegu sumarhátíðar og skákmóts við Selvatn, fimmtudaginn 11. júlí nk. Mótið sem nú er haldið í 13. sinn verður með sérstöku viðhafnarsniði í tilefni þess að Skákdeildin fagnar 20 ára afmæli sínu í haust. Hátíðarkvöldverður frá Eldhúsi Sælkerans verður reiddur fram undir beru lofti. Kaffi, kruðerí, svaladrykkir ofl í boði meðan á móti stendur.

Mótið sem er öllum opið hefst kl. 16.30 og stendur fram eftir kvöldi. Þátttaka takmarkast þó við að hámarki 40 keppendur. Tefldar verða 11 umferðir með 10 mínútna umhugsunartíma

Góð verðlaun og viðurkenningar. Þátttökugjald er kr. 10.000* og rennur állur ágóði til efla fjárhag skákklúbbsins, sem rekur starfssemi allt árið um kring og sendir tvær sveitir til keppni í Deildakeppninni í skák.

Klippur frá Selvatnamótinu í fyrra. Myndskreyting: ESE

Mótshöldurum er það mikil ánægja að bjóða bæði eldri sem yngri skákmenn velkomna til þessarar skemmtilegu skákhátíðar þar sem mönnum gefst kostur á að máta mann og annan út í guðgrænni nátturinni við fjallavatnið fagurblátt.

Þar sem keppendafjöldi er takmarkaður er áríðandi að þeir sem hafa hug á að vera með tilkynni þátttöku sína sem allra fyrst. Annað hvort með tölvupósti til kr.skak@gmail.com eða með SMS í síma 690-2000 (ESE)

Til staðfestingar og til að flýta fyrir óskast þátttökugjaldið greitt fyrirfram inn á reikning 115-26-47077, kt. 470776-0139 en ella með reiðufé á staðnum. Mæting kl. 16! *) Afsláttur 2F1 fyrir skákkonur!

Listaskálinn við Selvatn er skammt fyrir ofan Geitháls við Nesjavallaveg. Skákmerki verður sett upp við afleggjarann heim að Listaseli sem er til hægri þegar beygt er inn á heimtröðina.

- Auglýsing -