Atskákmót hjá TR í kvöld. Tefldar eru fimm skákir og tímamörkin eru 10 mínútur á skákina að viðbættum 5 sekúndum á hvern leik. Teflt er í einum flokki. Mótin eru öllum opin og reiknuð til alþjóðlegra atskákstiga. Teflt er í félagsheimili TR, Faxafeni 12 og taflmennskan hefst stundvíslega klukkan 19:30. Það þarf ekki að skrá sig fyrirfram, nóg að mæta á staðinn. Umsjón með mótunum hafa þeir Eiríkur K. Björnsson og Gauti Páll Jónsson. Þátttökugjald er 500kr. en frítt er fyrir 17 ára og yngri.
Veitt eru verðlaun, 3000 króna inneign í Skákbúðina, fyrir sigurvegara mótsins, og fyrir bestan árangur miðað við eigin stig (rating performance).
————
Það var góð mæting á Þriðjudagsmótið 10. janúar þrátt fyrir annað skákmót á sama tíma í Mosfellsbæ. 26 tefldu í TR og 42 í Mosfellsbæ, þannig að 68 tefldu á reiknuðu móti á Íslandi þetta þriðjudagskvöld. Skák er skemmtileg!
Kristófer Orri Guðmundsson, sem oft hefur verið sigursæll, vann að þessu sinni með fullu húsi. Þrír skákmenn fengu fjóra vinninga: Sigurbjörn Hermannsson, Arnar Breki Grettisson og Arnar Ingi Njarðarson. Sigurbjörn (1305) stóð sig frábærlega, var með árangur upp á 1721 og græðir 92 atskákstig úr fjórum atskáksigrum, geri aðrir betur! Hann fær árangursverðlaun frá Skákbúðinni, ásamt Kristófer sigurvegara mótsins.
Mótsstjórn var í höndum Jons Olav Fivelstad.
Næsta mót er í kvöld og hefst stundvíslega klukkan 19:30 eins og venjulega. Öll velkomin. Eða allir velkomnir. Að mati vefstjóra er hvoru tveggja alveg ásættanlega íslenska, rétt eins og stóra þornið í Þriðjudagsmót!
Úrlslit og stöðu mótsins er hægt að nálgast á chess-results.
Af heimasíðu TR.
