Tvær fyrstu viðureignirnar í átta manna úrslitum Íslandsmóts Símans í netskák 2026 fóru fram í gær, sunnudaginn 25. október. IM Aleksandr Domalchuk-Jonasson og GM Jóhann Hjartarson höfðu betur í æsispennandi einvígjum og eru þar með fyrstir til að tryggja sér sæti í undanúrslitum mótsins.
Teflt var á Chess.com og var bein útsending frá báðum viðureignunum á Símanum Sport auk YouTube- og Twitch-rása Rafíþróttasambands Íslands. „Gamla gengið“, FM-hnakkarnir Björn Ívar Karlsson og Ingvar Þór Jóhannesson, sá um skákskýringar dagsins.
Aleksandr hafði betur í miklu drama
Fyrri viðureign dagsins var milli IM Aleksandr Domalchuk-Jonasson og GM Helga Áss Grétarssonar. Aleksandr tefldi undir Chess.com-nafninu Chucksterf10 en Helgi undir nafninu DaggiGretarsson.
Það var sannkallað drama í einvíginu og þurfti bráðabana til að knýja fram úrslit. Helgi varð meðal annars fyrir því óláni að netsamband hans gaf sig þegar hann var með unna stöðu í bráðabanaskákinni! Skákin tapaðist fyrir vikið og einvígið hringsnerist á einum punkti!
Þar með tryggði Aleksandr sér sæti í undanúrslitum Íslandsmótsins.
Jóhann hafði betur eftir miklar sveiflur
Í seinni viðureigninni mættust GM Jóhann Hjartarson og FM Sigurbjörn Björnsson.
Eins og við mátti búast þegar tveir jafnreyndir skákmenn eigast við var lítið gefið eftir. Einvígið var afar sveiflukennt og ýmislegt gekk á áður en Jóhann náði að knýja fram sigur á endanum 1,5-3,5.
Jóhann, sem teflir undir nafninu eldur16 á Chess.com, nýtti reynslu sína vel þegar á leið og tryggði sér að lokum sigur í einvíginu og sæti í undanúrslitum.
Jóhann og Aleksandr eru því fyrstu tveir skákmennirnir sem komnir eru áfram í undanúrslit mótsins.
Tvö einvígi eftir í átta manna úrslitum
- IM Aleksandr Domalchuk-Jonasson – GM Helga Áss Grétarssyni – 4-3
- GM Jóhann Hjartarson – FM Sigurbjörn Björnsson – 3.5-1.5
Seinni tvær viðureignir átta manna úrslitanna fara fram sunnudaginn 1. nóvember kl. 15:00.
Þá mætast:
- FM Jón Kristinn Þorgeirsson – GM Vignir Vatnar Stefánsson
- GM Bragi Þorfinnsson – IM Hilmir Freyr Heimisson
Að þeim loknum liggur fyrir hvaða fjórir skákmenn berjast um Íslandsmeistaratitilinn í undanúrslitunum.
Undanúrslitin fara fram 8. nóvember og úrslitaeinvígið 15. nóvember.
Í hverju einvígi er teflt þar til annar keppandinn hefur náð 3½ vinningi. Verði staðan jöfn eftir hefðbundinn hluta einvígisins er teflt áfram þar til úrslit fást.
Verðlaunafé 250 þúsund krónur
Verðlaunafé mótsins er samtals 250.000 krónur. Íslandsmeistarinn fær 125.000 krónur, annað sætið 75.000 krónur og þeir sem tapa í undanúrslitum fá 25.000 krónur hvor.
Mótið er skipulagt af Rafíþróttasambandi Íslands í samstarfi við Skáksamband Íslands og Sjónvarp Símans.
Beinar útsendingar frá mótinu eru á Símanum Sport og einnig er hægt að fylgjast með á YouTube- og Twitch-rásum Rafíþróttasambands Íslands.
