Íslandsbikarinn – átta sterkustu skákmenn landsins tefla um sæti á heimsbikarmótinu

Á morgun, laugardaginn, 6. mars, kl. 14 hefst Íslandsbikarinn í skák. Átta sterkustu skákmenn landsins tefla útsláttarkeppni um laust sæti á næsta heimsbikarmóti í skák sem fram fer í Sochi í Rússlandi, síðsumars/haust.

Taflmennskan fer fram í Landsbankanum Austurstræti en vegna aðstæðna verður ekki hægt að leyfa áhorfendur. Þess í stað verður einkar mikið lagt í beinar útsendingar.

Meðal þessara átta skákmanna eru sex stórmeistarar, Íslandsmeistarinn í skák, Guðmundur Kjartansson og svo efnilegasti skákmaður landsins, hinn 18 ára, Vignir Vatnar Stefánsson, sem vann Skákþing Reykjavíkur fyrir skemmstu.

Hjörvar Steinn Grétarsson er stigahæstur keppenda og mætir Vigni í fyrstu umferð. Hannes Hlífar Stefánsson, sem er þrettánfaldur (!) Íslandsmeistari í skák er næststigahæstur, og mætir stórmeistaranum Braga Þorfinnssyni í fyrstu umferð. Jóhann Hjartarson er þriðji í stigaröðinni og hefur mesta reynslu allra í einvígum. Vann Viktor Korchnoi í einvígi árið 1988 eins og frægt er.  Hann teflir við Helga Áss Grétarsson. Íslandsmeistarinn Guðmundur teflir við Margeir Pétursson sem er afar ánægjulegt að fá aftur af krafti inn í innlent skáklíf.