Stórmeistarinn Vignir Vatnar Stefánsson bar sigur úr býtum á Borgarskákmótinu 2026 sem fram fór í Ráðhúsi Reykjavíkur fimmtudaginn 20. ágúst. Alls tóku 58 skákmenn þátt í mótinu, sem var nú haldið í 41. sinn.
Borgarskákmótið er samstarfsverkefni Reykjavíkurborgar og Taflfélags Reykjavíkur og hefur um árabil skipað fastan sess í skáklífi borgarinnar. Tefldar voru sjö umferðir í hraðskák með umhugsunartímanum fjórar mínútur auk tveggja sekúndna á hvern leik.
Vignir Vatnar, sem var stigahæsti keppandi mótsins, fékk 6 vinninga af 7 mögulegum. Jafn honum að vinningum varð alþjóðlegi meistarinn Björn Þorfinnsson með sigri á Vigni í loka umferðinni. Vignir varð ofar á oddastigum og tryggði sér sigurinn.
Baráttan um efstu sætin var hörð. Oliver Jóhannesson varð þriðji með 5½ vinning, Tómas Björnsson fjórði, einnig með 5½ vinning, og Gunnar Björnsson náði frábærum árangri og varð fimmti með 5½ vinning.
Efstu fimm:
- Vignir Vatnar Stefánsson – 6
- Björn Þorfinnsson – 6
- Oliver Jóhannesson – 5½
- Tómas Björnsson – 5½
- Gunnar Björnsson – 5½
Fjölmargir ungir skákmenn stóðu sig einnig vel. Birkir Hallmundarson vakti meðal annars athygli með 4 vinninga og frammistöðu upp á 2013 stig, en hann var skráður með 1890 stig fyrir mótið. Katrín Ósk Tómasdóttir fékk sömuleiðis 4 vinninga, varð í 24. sæti og tefldi upp á 1793 stig þrátt fyrir að vera skráð með 1663 stig.
Hallgerður Þorsteinsdóttir varð efst kvenna með 4½ vinning og hafnaði í 14. sæti í heildarkeppninni. Iðunn Helgadóttir fékk 4 vinninga og varð í 20. sæti.
Heildarúrslit Borgarskákmótsins 2026 á Chess-Results
Ljósmyndir frá mótinu má sjá á ljósmyndasíðu Skáksambands Íslands
