Íslandsbikarinn hófst í dag en teflt er í Landsbankanum, Austurstræti. Lilja Björk Einarsdóttir, bankastjóri Landsbankans, setti mótið og lék fyrsta leikinn fyrir Vigni Vatnar Stefánsson á móti Hjörvari Steini Grétarssyni.
Mótið er útsláttarmót. Tefldar tvær kappskákir með fullum umhugsunartíma. Verði niðurstaðan 1-1 verður teflt til þrautar með skemmri umhugsunartíma. Svo fór að allar skákir dagsins enduðu með hreinum úrslitum. Þeir sem töpuðu í dag þurfa því nauðsynlega að vinna á morgun til að jafna metin og knýja fram framlengingu sem fram fer á mánudaginn.
Hjálp bankastjórans, dugði Vigni skammt á móti Hjörvari sem var fyrstur að vinna sína skák.
Hannes Hlífar Stefánsson, þrettánfaldur Íslandsmeistari, vann sannfærandi sigur á Braga Þorfinnssyni eftir að hafa fórnað manni fyrir sókn.
Jóhann Hjartarson mátaði Helga Áss Grétarssyni í fjörugri skák.
Guðmundur Kjartansson lagði Margeir Pétursson að velli, að loknu hróksendatafli.
Seinni kappskákin hefst á morgun kl. 14. Má gera ráð fyrir að hart verði barist enda þurfa taparar dagsins allir nauðsynlega á sigri að halda.
Bein lýsing hefst um kl. 15.
