Hrafn Jökulsson ásamt grænlenska skákmeistaranum Steffen Lynge. Markmið Hróksins ekki bara að kenna skák, heldur skapa gleðistundir og efla vináttu grannþjóðanna.

Hrókurinn stendur fyrir mikilli skák- og sirkus hátíð í Kullorsuaq, sem er 450 bær á samnefndri eyju við vesturströnd Grænlands, dagana 11.-16. ágúst. Kullorsuaq, sem er á 74. breiddargráðu, er eitt afskekktasta þorp Grænlands, og er þetta annað árið í röð sem Hrókurinn heldur hátíð þar í samvinnu við heimamenn.

Leiðangursmenn Hróksins eru Hrafn Jökulsson, sem mun kenna skák, og sirkuslistamennirnir Axel Diego og Roberto Magro, sem verða með sýningar og sirkusskóla. Að aflokinni hátíðinni í Kullorsuaq verður boðið upp á fjöltefli og sirkussýningu í Upernavik, sem er liðlega 1000 manna bær.

Sirkuslistamennirnir Axel og Roberto verða með sirkusskóla á hátíð Hróksins í Kullorsuaq.

Þeir Axel og Roberto voru með sirkusskóla í Kullorsuaq á vegum Hróksins í fyrra, jafnt fyrir börn sem fullorðna, og síðan hafa bæjarbúar komið reglulega saman til að æfa sig í sirkuslistum. Jafnframt var stofnað skákfélag í bænum, enda skildu liðsmenn Hróksins eftir bæði sirkusbúnað og taflsett.

Þetta er fimmta ferð Hróksins til Grænlands á þessu ári, en landnám skáklistar og vináttu á vegum félagsins hófst árið 2003. Margir leggjast á eitt til að gera hátíðina í Kullorsuaq að veruleika. Meðal helstu bakhjarla eru NAPA, NunaFonden, sveitarfélagið Avannaata, Air Iceland Connect, ÍsSpor, Air Greenland Connect og fjöldi fyrirtækja og einstaklinga sem leggja til verðlaun, gjafir og vinninga.

,,Við erum afar stolt og glöð yfir því að geta endurtekið leikinn frá því í fyrra í Kullorsuaq, en þá heppnaðist hátíðin frábærlega,” segir Hrafn Jökulsson forseti Hróksins. ,,Að baki er margra mánaða undirbúningur, og þar á kraftaverkakonan Birgitta Kamann Danielsen í Kullorsuaq stærstan hlut. Það er meira en að segja það, að skipuleggja svo veglega hátíð á svo afskekktum stað. Við mætum með gleðina að leiðarljósi. Það verður líka gaman að hitta börn og fullorðna í Upernavik, en þangað komum við Hróksliðar síðast í desember 2013.”

Polar Pelagic-hátíð í Tasiilaq: Til minningar um Gerdu Vilholm

Samtímis því sem Hrafn, Axel og Roberto verða á vesturströndinni munu Máni Hrafnsson og Joey Chan slá upp Polar Pelagic-hátíð í Tasiilaq, höfuðstað Austur-Grænlands, sem helguð er minningu Gerdu Vilholm. Þetta er þriðja minningarhátíðin í Tasiilaq um Gerdu, sem lést í ársbyrjun 2017. Hún var máttarstólpi mannlífsins í Tasiilaq og heiðursfélagi í Hróknum.

Máni Hrafnsson hefur tekið þátt í skáklandnámi Hróksins frá upphafi 2003.

,,Við minnumst einstakrar konu, sem var heiðursfélagi í Hróknum,” segir Hrafn. ,,Gerda rak einu bókabúðina í Tasiilaq, sem hún kallaði Háskóla alheimsins. Þar var griðastaður barnanna í Tasiilaq, og þangað komu þau til að tefla og njóta lífsins. Gerda var heiðursfélagi í Hróknum og hennar er sárt saknað. En við minnumst hennar best með því að skapa gleðistundir fyrir börnin í bænum.”

Gleðigjafinn Joey Chan. Hún er margreyndur Grænlandsfari og mun m.a. sjá um myndlistarkeppni barnanna í Tasiilaaq.

Máni og Joey munu kenna skák í skólanum, efna til margvíslegra viðburða og myndlistarsamkeppni, auk þess að heimsækja heimili fyrir börn sem ekki geta dvalið hjá foreldrum sínum og fleiri staði. Þau munu jafnframt færa Amarngivat, sem er opið og ókeypis dagheimili fyrir ung börn, gnótt af fatnaði og gjöfum sem seld verða við vægu verði í þágu þessa einstaka heimilis, sem nú berst í bökkum.

Heiðbjört Ingvarsdóttir nestar Hróksmenn með ótal böngsum í splunkunýjum prjónafötum.

,,Austur-Grænlendingar standa okkur Íslendingum næst og við erum heppin að eiga slíka nágranna. Markmið Hróksins er ekki bara að útbreiða skák, heldur efla vináttu og samvinnu grannþjóðanna á sem allra flestum sviðum,” segir Hrafn.

Helstu bakhjarlar hátíðarinnar í Tasiilaq eru Polar Pelagic, Air Iceland Connect, Kópavogsbær, ÍsSpor og fjölmörg fyrirtæki og einstaklingar sem gefa verðlaun, vinninga og gjafir.

,,Það er óhætt að segja að við stöndum í stórræðum nú í ágúst, og við þökkum af heilum hug öllum þeim óteljandi einstaklingum og fyrirtækjum sem leggja okkur lið. Með hverju ári sem líður verður okkur betur ljóst hve mikilvægt er að skapa gleðistundir á Grænlandi. Og aldrei skulum við gleyma því, að Íslendingar eru heppnasta þjóð í heimi þegar kemur að nágrönnum,” segir Hrafn.

- Auglýsing -