Heimsmeistarinn í at- og hraðskák Magnus Carlsen (2818) er enn í efsta sæti á Heimsmeistaramótinu í atskák í Samarkand í Úzbekistan. Magnus leyfði þó þrjú jafntefli á degi tvö og almennt var mikið um jafntefli. Magnus er með 7 vinninga af 9 ásamt „Slóvenanum“ Vladimir Fedoseev og hinum ólseiga Yu Yangyi sem er ótrúlega oft traustur á þessum mótum, nartar í toppinn en vinnur þó aldrei.

Samantekt frá fyrsta keppnisdegi:

Magnus kom sér í fína stöðu strax í 6. umferð. Þá lagði hann Vidit að velli en sá indverski vann sig einmitt inn í Áskorendamótið á dögunum. Magnus sýndi enn og aftur hvar hann er sterkastur, að kreysta vinninga úr jafnteflislegum endatöflum.

Aftur riddaraendatafl og aftur 0.00 í tölvunum. Eins og gegn Khismatullin í gær er peðastaðan mjög svipuð en aftur er hvíta h-peðið veikt. Hvítur virðist þó halda í horfið hér í 36. leik. Hér upphófst norska svæðanudd.

Niðurstaðan var að Vidit fór á taugum hér í 53. leik og gaf h-peðið með 53.Rd2? Vidit hefur orðið eitthvað hræddur í vörninni. Riddari hans er bundinn við að valda h-peðið og kóngurinn er bundinn við að valda f2-peðið. Hann hefur e.t.v. talið að Magnus hefði getað farið af stað með kónginn á drottningarvæng og ekki viljað bíða og sjá. Eftirleikurinn varð nokkuð auðveldur fyrir Magnus eftir þetta.

Aðrir gerðu jafntefli á efstu borðum og Magnus því efstur eftir 6 umferðir með 5,5 vinning en margir með 5 vinninga.

Yu Yangyi náði í skottið á Magnusi í næstu umferð þegar hann vann sína skák en Magnus gerði tiltölulega stutt jafntefli með hvítu gegn Arjun Erigaisi.

Þeir mættust innbyrðis í áttundu umferðinni. Yangyi náði að vinna peð en Magnus hafði alltaf pressu í staðinn og var aldrei í vandræðum og jafntefli samið þegar komið var í hróksendatafl.

Fedoseev náði þeim tveim að vinningum með því að leggja Erigaisi að velli. Leið Erigaisi í Áskorendamótið er því orðin aðeins erfiðari.

Þeir Fedoseev, Carlsen og Yu Yangyi gerðu svo allir jafntefli í níundu umferðinni og leiða eins og áður sagði með 7 vinninga af 9. Magus var hinsvegar allt annað en sáttur enda hafði hann vænlegt endatafl gegn Þjóðverjanum Vincent Keymer

Pakkinn með 6,5 er svo stór og ljóst að úrslit munu varla ráðast fyrr en í lokaumferðunum á morgun.

Magnus fær svart á Fedoseev í 10. umferðinni en Yu Yangyi þarf að kljást við MVL.

Í lokin má benda á að þetta bara gerðist í áttundu umferð!

 Kvennaflokkur

Í kvennaflokki er Anastasia Bodnaruk efst eftir 8 umferðir með 7 vinninga. Koneru Humpy frá Indlandi og Mo Zhai frá Kína hafa 6,5 vinning.

Atskákinni lýkur á morgun með fjórum umferðum í opnum flokki og þremur umferðum í kvennaflokki.

- Auglýsing -

TENGDAR GREINARFLEIRI FRÉTTIR