Helgina 7.-8. júní síðastliðinn hélt Skákskóli Íslands námskeið fyrir krakka í 2.-5. bekk grunnskóla, á Borg í Grímsnesi. Gauti Páll Jónsson sá um námskeðið. Stefnt er að öðru námskeiði fyrir 6.-10. bekk á Laugarvatni í júlí. Það verður auglýst fljótlega.
Hluti af námskeiðinu var að fá stórmeistara í skák til að binda endi á skákhelgina með fjöltefli og loks þátttöku í opna hraðskákmótinu. Sex nemendur námskeiðsins tefldu gegn Vigni í fjölteflinu og Vignir vann fimm skákir en ein skák endaði jafntefli, gegn Esteban Gabriel Olguin Gunnarssyni.
Þátttaka í hraðskákmótinu var afar góð en 20 manns tóku þátt. Nokkrir komu úr Reykjavík, þ.m.t forsetaframbjóðandinn Kristján Örn, og fólk úr nærliggjandi byggðum og sumarbústöðum. Tefldar voru fimm umferðir með tímamörkunum 5+3 og vann Vignir allar skákir sínar. Þeir Kristján Örn og Gauti Páll fengu fjóra vinninga.
Skákskólinn þakkar Grímsnes- og Grafningshreppi kærlega fyrir samstarfið en námskeiðið og mótið var haldið í Félagsheimilinu Borg.
Mótið á chess-results.
