Af gefnu tilefni langar okkar að snerta á nokkrum punktum varðandi verðlaun, merkingu þeirra og markmið. Við höfum fulla trú á að mistök tengd verðlaunum séu óviljaverk og hugsanaleysi. Við viljum hinsvegar hvetja ykkur til að hugsa vel um þau verðlaun sem þið veitið og hafið eftirfarandi punkta í huga.
Verðlaunum er ætlað að vera hvetjandi, þau eiga að hvetja til aukins árangurs, þátttöku og að sýna að með góðri vinnu er hægt að bæta sig og komast á toppinn. Þau eru ekki bara upp á gamanið eða myndina eða til að eiga bikar, sérstaklega ekki þegar börn eru komin yfir 12 ára aldur. Aukaverðlaun í mótum eru gífurlega algeng og bera sinn eigin tilgang, gjarnan til að hvetja ákveðna hópa til þátttöku. Það er megin hugmyndin með kvenna- og stúlknaverðlaunum. Ef grunnmarkmiðið er að hvetja stúlkur til að taka þátt þá verður hugsunin á bakvið verðlaun að vera rétt vegna þess ef hún klikkar getur það haft öfugt við ætluð markmið.
Öll verðlaun bera í sér ákveðna merkingu fyrir þann sem þau fær og þá sem standa nálægt þeim. Merkingu sem mótshaldarar gera sér gjarnan ekki grein fyrir. Hugsið vel út í það hvaða merkingu það hefur að rétta stelpu bikar sem stendur á drengjaverðlaun vegna þess að auglýsing var rangt orðuð eða vegna þess að engum datt í hug að stelpa gæti unnið Íslandsmót 15 ára og yngri. Opinn flokkur er fyrir alla! Topp stelpur og konur taka aldrei þátt í mótum til þess eins að vinna stúlknaverðlaun, við tökum þátt til að vinna, til að sýna að við getum verið bestar. Hugsið mjög vel út í það ef stelpa vinnur opinn flokk en fær bara verðlaun fyrir að vera efsta stelpan þegar hún veit að hún ætti með réttu að fá bæði. Hugsið hvaða skilaboð þið vijið setja í verðlaunin og hvort þau séu í takt við markmið og tilgang þeirra. Sama skal hafa í huga þegar fréttir um mót eru skrifaðar.
Ef verðlaun fyrir bestan árangur stúlkna eða kvenna er eitthvað sem þið viljið að sé partur af ykkar móti er mjög mikilvægt að hafa í huga hvaða skilaboð felast í þeim vegna þess að þau sitja eftir í minningunni. Mistök í verðlaunum rifjast gjarnan upp að ári þegar kemur að sama móti, þau eru rædd og þau setja framtíðarsvip á mótið. Hugsið vel út í það sem þið eruð að segja þegar þið afhendið verðlaunin og setjið ykkur í spor viðtakandans.
Eftir um 20 ára reynslu af því að taka við ýmsum verðlaunum og horfa á nemendur mína taka við verðlaunum vil ég leggja til að þið hafið eftirfarandi ávallt í huga.
- Ef verðlauna á fyrir efstu stúlku og dreng á það að vera mjög skýrt í auglýsingu mótsins og æskilegast er að efsti keppandi mótsins, sama hvaða kyn, fái verðlaun fyrir það – tveir sigurvegara en þrenn verðlaun. Þetta eru lög SÍ í dag varðandi Íslandsmeistarmót barna og unglinga.
- Ef hafa á aukaverðlaun þá á að vera skýrt hvað gerist ef einhver vinnur tvenn verðlaun, annað hvort fær keppandinn að velja eða hann fær þau verðlaun sem eru betri – nema hann fái bæði en það er sjaldnast þannig og er það fullkomlega í lagi.
Þetta er mjög einfalt í framkvæmd og kemur í veg fyrir mun meira en margir átta sig á. Staðreyndin er sú að þegar þetta fer úrskeiðis þá er það ennþá rifjað upp 15 árum seinna og það vill enginn.
Fyrir hönd kvennaskáknefndar SÍ,
Jóhanna Björg, formaður kvennaskáknefndar og Íslandsmeistari drengja 2008.
