Um þessar mundir er liðin hálf öld frá því Íslendingar tóku fyrst þátt í Norðurlandakeppni framhaldsskóla í skák og sigruðu glæsilega. Um var að ræða lið Menntaskólans við Hamrahlíð. Þessi sigur hefur eflaust lagt grunninn að því að MH varð mjög sigursæll skóli á þessum mótum næstu árin og áratugina. MH hefur, allt frá stofnun hans árið 1966, verið þekktur fyrir að vera nokkurs konar uppeldisstöð fyrir íslenska skákmenn í gegnum tíðina og oft hafa efnilegir skákmenn sóst sérstaklega eftir því að komast í skólann vegna skákmenningarinnar þar. Nokkrir af stórmeisturum landsins voru til að mynda nemendur við skólann á sínum tíma.
Keppnin var haldin í Gautaborg í lok nóvember og byrjun desember 1973. Liðið sigraði með nokkrum yfirburðum, fékk 11½ vinning af 15 mögulegum, heilum þremur vinningum fyrir ofan næstu sveit. Nokkuð var fjallað um þetta í fjölmiðlum, bæði í dagblöðum og sjónvarpsfréttum. Og m.a. var haft eftir Hólmsteini Steingrímssyni, þáverandi formanni TR að þetta væri “stærsti sigur Íslendinga hingað til í sveitakeppni á erlendri grund” eins og það var orðað í fjölmiðlum. Einnig var nokkuð fjallað um þennan sigur í norrænum skáktímaritum.
Í liðinu voru:
- Kristján Guðmundsson (3 vinningar)
- Björn Halldórsson (1½ vinningur)
- Ómar J. Jónsson (1½ vinningur)
- Helgi Ólafsson (2½ vinningur)
- Adolf E. Petersen (3 vinningar)
Þess má geta að margir kennarar skólans á þessum tíma voru þekktir skákmeistarar og má þar m.a. nefna þá Guðmund Arnlaugsson rektor, Ingvar Ásmundsson, Braga Halldórsson, Jón Böðvarsson, Stefán Briem og Bjarna Ólafsson. Slíkt hafði töluvert að segja um skákáhuga nemenda við skólann. Sömuleiðis má nefna að þetta var á þeim tíma þegar skákáhugi í landinu var í miklum uppgangi eftir heimsmeistaraeinvígið hér á landi árið áður.
Sótt var um styrk til ferðarinnar í menntamálaráðuneytið á handskrifuðu blaði, sem varð býsna frægt plagg í opinbera geiranum en svo sagði Ólafur H. Ólafsson frá.
