Matthías Björgvin varð Íslandsmeistari í skólaskák í yngri flokki.

Landsmótið í skólaskák fór fram á chess.com fyrr í dag. Mótið fór í fyrsta sinn fram á netinu og krýndir voru bæði Landsmótsmeistarar og Kjördæmameistarar í skólaskák. 63  keppendur voru með og þar af margir sterkustu skákkrakkar landsins á grunnskólaaldri. Tefldar voru níu umferðir í einum flokki með tímamörkunum 10 2.

Sigurvegari í yngri flokki og efstur á mótinu öllu var Matthías Björgvin Kjartansson, Landakotsskóla, með sjö og hálfan vinning af níu mögulegum. Sigur Matthíasar er einkar glæsilegur í ljósi þess að hann missti niður einn vinning vegna sambandsleysis við chess.com snemma á mótinu. Hann kom gríðarlega sterkur til baka og tryggði sér sigurinn þrátt fyrir að hafa á afar slysalegan hátt pattað Batel Goitom Haile í kolunnu endatafli. Í öðru sæti var Gunnar Erik Guðmundsson, Salaskóla og í þriðja sæti varð Adam Omarsson, Háteigsskóla. Báðir hlutu þeir 7 vinninga.

Kristján Dagur varð Íslandsmeistari í eldri flokki. Mynd: Helgi ÁRnason

Sigurvegari í eldri flokki var Kristján Dagur Jónsson, Langholtsskóla, Í öðru sæti var Benedikt Þórisson, Austurbæjarskóla og Arnar Valsson, Vættaskóla.

Lokastöðuna og allar skákir mótsins má finna á Chess.com.

Fyrir sigurinn hljóta þeir Matthías Björgvin og Kristján Dagur ferðastyrk á skákmót að verðmæti 50.000 kr. Styrkinn má nota á skákmót innanlands eða erlendis. Munu þeir einnig fá til varðveislu í eitt ár Riddarana sem margir af sterkustu skákmönnum landsins varðveittu á sínum yngri árum. Þeir fá Riddarana veglegu afhenta um helgina þegar Íslandsmót barna- og grunnskólasveita fer fram.

Kjördæmameistarar, yngri og eldri flokkar: 

Reykjavík

  • Kristján Dagur Jónsson, Langholtsskóli
  • Matthías Björgvin Kjartansson, Landakotsskóla 

Reykjanes

  • Gunnar Erik Guðmundsson, Salaskóla
  • Þorsteinn Jakob Freyr Þorsteinsson, Álfhólsskóla 

Suðurland

  • Magnús Tryggvi Birgisson Vallaskóla
  • Þrándur Ingvarsson Flúðaskóla 

Norðurland eystra

  • Markús Orri Óskarsson Síðuskóla (yngri)

Vesturland

  • Bjartmar Áki Sigvaldason Grunnskóla Borgarfjarðar (eldri)

Austurland

  • Orri Páll Pálsson Eskifjarðarskóli
  • Benedikt Arnfinnsson Nesskóli

Vestfirðir

  • Björn Viktor Gústavsson Bíldudalsskóli (eldri)
- Auglýsing -