Vígreifur Skákmeistari TR 2020, Helgi Áss Grétarsson, við taflið. — Morgunblaðið/Kristinn Magnússon

Helgi Áss Grétarsson og Hjörvar Steinn Grétarsson gerðu jafntefli í skemmtilegri baráttuskák lokaumferðar Haustmóts Taflfélags Reykjavíkur sem fram fór á föstudagskvöldið í síðustu viku. Sá fyrrnefndi varð að vinna til að hafa sigur á mótinu og átti vænleg færi um tíma. Hann missti af snjöllum drottningarleik Hjörvars sem eftir það hafði jafntefli í hendi sér en eftir 88 leiki sætti hann sig við skiptan hlut. Lokastaðan í A-riðli varð þessi:

1. Hjörvar Steinn Grétarsson 8 v. (af 9) 2. Helgi Áss Grétarsson 7½ v. 3. Guðmundur Kjartansson 7 v. 4. Bragi Þorfinnsson 5½ v. 5. Sigurður Daði Sigfússon 4½ v. 6. Vignir Vatnar Stefánsson 4 v. 7.-8. Davíð Kjartansson og Símon Þórhallsson 3 v. 9. Sigurbjörn Björnsson 1½ v. 10. Halldór Grétar Einarsson 1 v.

Þar sem Hjörvar er ekki félagi í TR hlýtur Helgi Áss sæmdarheitið skákmeistari TR 2020.

Í B-riðli sigraði Lenka Ptacnikova , hlaut 6½ vinning (af 9), en í 2.-3. sæti komu Alexander Oliver Mai og Þorvarður Ólafsson með 6 vinninga.

Í Opna flokknum, C-riðli, urðu efstir Elvar Már Sigurðsson og Jóhann Jónsson , hlutu báðir 7½ vinning (af 9). Batel Goitom varð í 3. sæti með 7 vinninga.

Óvenjulegar leikreglur á Altibox-mótinu í Stafangri

Enn ríkir fullkomin óvissa um framkvæmd margra mikilvægra skákviðburða en þó hafa opnast glufur bæði hér á landi og erlendis. Norðmenn halda nú Altibox-skákmótið í Stafangri í áttunda sinn. Sex skákmenn tefla tvöfalda umferð með óvenjulegu tímafyrirkomulagi; keppendur fá tvær klukkustundir á fyrstu 40 leikina, án aukatíma, en eftir það bætast eingöngu við 10 sekúndur á hvern leik. Gefin eru þrjú stig fyrir sigur, eitt fyrir jafntefli sem kallar á bráðabana og bætist ½ vinningur við þann hlutskarpari. Þannig fékk Magnús Carlsen 1½ vinning í tveimur fyrstu umferðunum. Í fjórðu, sem tefld var á fimmtudaginn, vann Magnús svo Fabiano Caruana og komst á toppinn. Hann hefur níu vinninga, Aronjan er með átta stig, Caruana og Firouzja sjö stig og Aryan Tari og Pólverjinn Duda reka lestina.

Næststerkasti skákmaður Norðmanna er sennilega hinn 21 árs gamli Aryan Tari. Hann á íranska foreldra en hefur alla tíð búið í Noregi. Hann byggði upp vænlega stöðu gegn Magnúsi í 3. umferð. En í miðtaflinu gaf hann höggstað á sér:

Aryan Tari – Magnús Carlsen

Sikileyjarvörn

1. e4 c5 2. Rf3 Rc6 3. d4 cxd4 4. Rxd4 Rf6 5. Rc3 d6 6. Bg5 Bd7 7. Dd2 a6

8. 0-0-0 e6 9. f4 Be7 10. Rf3 b5 11. Bxf6 gxf6 12. Kb1 Db6 13. f5 0-0-0 14. Bd3 Kb8 15. Re2 Bc8 16. Rf4 Re5 17. Be2 d5?!

Eftir tiltölulega hefðbundna byrjun leggur svartur til atlögu.

18. exd5 exf5

Kannski ætlaði hann að leika 18. … Rxf3 19. Bxf3 e5 en eftir 20. Rg5 Bxf5 21. De2 ásamt – Be4 er of auðvelt að tefla hvítu stöðuna.

19. Rd4 Bc5 20. Hhf1 Hhe8 21. a3 Ka8 22. h3 Bd7 23. Rh5

Hér missir hann þráðinn. Gott var 23. b4! eða jafnvel 23. d6!?

23. … Rc4 24. Bxc4 bxc4 25. Dc3 Hb8 26. Hf3

26. … He1!

Magnaður hróksleikur.

27. Hxe1 Bxd4 28. Db4 Dc7 29. d6 Dc6 30. Da5 Bxb2 31. Ka2 Be5 32. Hb1 Hxb1 33. Kxb1 Dxd6 34. Kc1 Dd4 35. Dxa6+ Kb8 36. c3 Dg1+ 37. Kd2 Dxg2+ 38. Ke3

 

 

38. … f4+!

Lokahnykkurinn.

39. Rxf4 Bxf4+ 40. Hxf4 Dg3+ 41. Hf3 De1+ 42. Kd4 De5+ 43. Kxc4 De4+ 44. Kc5 Dxf3 45. Kd6 Bc8

– og hvítur gafst upp.

Skákþættir Morgunblaðsins birtast á Skák.is viku síðar en í blaðinu sjálfu. Þessi skákþáttur birtist 10. október 2020.

- Auglýsing -