Rúnar Sigurpálsson Skákmeistari Norðlendinga í áttunda sinn!

Skákþing Norðlendinga, hið 86. í röðinni, fór fram á sunnudaginn. Mótið hefur verið haldið óslitið frá árinu 1935 en skipulagning mótsins í ár reyndist erfiðari en oft áður út af dottlu.

Brugðið var á það ráð að halda mótið á skákþjóninum Tornelo, en hann hefur reynst skipuleggjendum afar vel undanfarið þar sem reglurnar þar eru líkari borðskák en hjá öðrum og þar er auðvelt að tengja menn saman í mynd með aðstoð Zoom. Upplifunin verður því eins nálægt hefðbundnu skákmóti og mögulegt er.

Tuttugu og þrír keppendur mættu að þessu sinni, jafnt núverandi og fyrverandi Norðlendingar sem og gestir sem gripu tækifærið til að taka þátt í þessu sögufræga móti, sem eins og áður sagði var aðgengilegra en oft áður.

Tefldar voru 9 umferðir með tímamörkunum 8 mínútur að viðbættum 2 sekúndum á leik.

Mótið í ár var afar vel skipað og var hart barist um hvern vinning. Akureyringarnir Rúnar Sigurpálsson og Andri Freyr Björgvinsson reyndust allra manna aðsópsmestir og mátti vart á milli sjá hvor þeirra stæði upp sem sigurvegari að lokum. Báðir enduðu þeir með 7,5 vinninga en Rúnar hafði betur eftir stigaútreikning og hampar því sínum 8. Noðurlandsmeistaratitli!

Næstir á eftir þeim Rúnari og Andra voru FM Þorsteinn Þorsteinsson, CM Arnar Þorsteinsson og Tómas Veigar Sigurðarson, með 6 vinninga. Tómas var sá eini þeirra með lögheimili á Norðurlandi og var því í þriðja sæti.

Mótshaldarar þakka keppendum fyrir afar skemmtilegt mót, og færa mótsstjóranum Gunnari Björnssyni kærar þakkir fyrir aðstoðina!

• Skákir mótsins
• Lokastaðan á Chess-Results

Lokastaðan

Skákmeistarar Norðlendinga frá upphafi

Fjöldi titla