Kóngspeðið Nils Grandelius heilsar andstæðingi sínum í 2. umferð. — Morgunblaðið/Heimasíða REK/E

Rauf Mamedov frá Aserbaídsjan náði einn forystu eftir sjöttu umferð Reykjavíkurskákmótsins/Evrópmóts einstaklinga sem stendur yfir við góðar aðstæður á Hotel Natura í Reykjavík. Mamedov vann Frakkann Maxime Lagarde í 6. umferð með svörtu og hefur því unnið tvær lykilskákir í toppbaráttunni röð og á þeim tímapunkti í mótinu þegar lokaspretturinn er að hefjast er hann óneitanlega sigurstranglegur með 5½ vinning. Í 2.-5. sæti koma Rússinn Anton Demchenko, Hovhannes Gabusjan frá Armeníu, Pólverjinn Piorin Kacper og Vincent Keymer, eitt mesta efni sem Þjóðverjar hafa eignast. 13 skákmenn eru með 4½ vinning.

Hannes Hlífar Stefánsson stendur best að vígi íslensku keppendanna með 4 vinninga en þeir Jóhann Hjartarson, Hjörvar Steinn Grétarsson, Vignir Vatnar Stefánsson, Héðinn Steingrímsson og Bragi Þorfinnsson eru allir með 3½ vinning. Góður endasprettur getur fleytt þeim í efstu sætin.

Útsjónarsamur Vignir Vatnar á Hótel Natura.

Vignir Vatnar Stefánsson, sem fyrr á þessu ári var sæmdur titli alþjóðlegs meistara, hefur átt gott mót þrátt fyrir slæma byrjun. Hann hefur verið þrautseigur í erfiðum stöðum, t.d. í skák sinni við Héðin Steingrímsson í 6. umferð. Í umferðinni á undan komst hannn einnig í hann krappan gegn ítölskum andstæðingi en þá kom þessi staða upp:

 

 

 

 

Pier Basso – Vignir Vatnar Stefánsson

Í þessari stöðu er útlitið ekki gott því að a7-peðið er að falla og frípeð hvíts taka síðan á rás. Vignir lék …

44. … Hf4+!

Mun betra en 44. … Hxg4 45. Hxa7 og hvítur á vinningsstöðu. )

45. Kg3 He4 46. Hxa7?

Hann hefði betur leikið 46. Kf2 og eftir 46. … Hf4+ 47. Ke3! Hxg4 48. d5! er hróksendataflið sennilega tapað.

46. … He3+ 47. Kf2

Og nú nær áætlun Vignis fram að ganga…

47. … He2+!

Gefur hrókinn og eltir kónginn eftir e-línunni.

48. Kxe2

Það er ekkert um annað að ræða. Vandinn er hins vegar sá að svartur er patt.

Jafntefli.

Einn fastagesta Reykjavíkurskákmótanna er sænski stórmeistarinn Nils Grandelius. Hann hefur fyrir nokkru tekið sæti Ulfs Andersson sem langbesti skákmaður Svía. Nils er hefur farið rólega af stað en búast má við honum sterkum á lokasprettinum. Í 4. umferð vann hann Tékkann Lubomir Ftacnik í aðeins 29 leikjum en skákin var um margt athyglisverð. Ftacnik hefur aldrei vikist undan því að taka slaginn í vinsælum afbrigðum sikileyjarvarnar en kom ekki að tómum kofunum hjá andstæðingi sínum:

Nils Grandelius –Lubomir Facnik

Sikileyjarvörn

1. e4 c5 2. Rf3 d6 3. d4 cxd4 4. Rxd4 Rf6 5. Rc3 e6 6. g4

Leikur Keresar.

6. … h6 7. Hg1 Rc6 8. Be3 Bd7 9. Be2 d5 10. exd5 Rxd5 11. Rxd5 exd5 12. Dd2 Bd6 13. O-O-O Bxh2

Það hefur yfirleitt ekki verið talið gott að teygja sig eftir þessu peði. Um það vitna nokkrar skákir.

14. Hh1 Be5 15. Rf3 Dc7 16. Rxe5 Rxe5 17. Kb1 Rxg4 18. Bf4 Dc6 19. Dd4!

Ótrúlega erfiður leikur því það er vart hægt að valda g7-peðið.

19 … Rf6 20. Hdg1 Kf8?

Eina vörnin að mati „vélanna“ var 20. … Db6 og svartur ætti að gera barist áfram.

21. Db4+! Kg8 22. Bxh6 Re8

23. Bxg7!

Þetta kostar ekki mikla útreikninga.

23. … Rxg7 24. Dd4! Bg4

Eða 24. … f6 25. Hxh8+ Kxh8 26. Dh4+ Kg8 27. Dh6 o.s.frv.

25. Hxh8+ Kxh8 26. Hxg4 f6 27. Df4 Kg8 28. Dh6 Dd7 29. Bf3!

– og svartur gafst upp.

Skákþættir Morgunblaðsins birtast á Skák.is viku síðar en í blaðinu sjálfu. Þessi skákþáttur birtist 2. september. 

- Auglýsing -