Atskákmót hjá TR í kvöld. Tefldar eru fimm skákir og tímamörkin eru 10 mínútur á skákina að viðbættum 5 sekúndum á hvern leik. Teflt er í einum flokki. Mótin eru öllum opin og reiknuð til alþjóðlegra atskákstiga. Teflt er í félagsheimili TR, Faxafeni 12 og taflmennskan hefst stundvíslega klukkan 19:30. Það þarf ekki að skrá sig fyrirfram, nóg að mæta á staðinn. Umsjón með mótunum hafa þeir Eiríkur K. Björnsson og Gauti Páll Jónsson. Þátttökugjald er 500kr. en frítt er fyrir 17 ára og yngri.
Veitt eru verðlaun, 3000 króna inneign í Skákbúðina, fyrir sigurvegara mótsins, og fyrir bestan árangur miðað við eigin stig (rating performance).
————
Þrír stigahæstu þátttakendur Þriðjudagsmótsins 14. febrúar voru fljótir að raða sér á efri borð á næstfjölmennasta móti ársins til þessa. Ekki fór þó allt alveg eftir bókinni þaðan í frá og má þar fyrst nefna að Logi Rúnar Jónsson setti aðeins strik í reikning Torfa Leóssonar með því að gera við hann jafntefli í þriðju umferð og Kristófer Orri Guðmundsson lagði Gauta Pál Jónsson í 4. umferð. Þannig gerðist það að Kristófer var einn með fullt hús fyrir lokaumferðina og dugði jafntefli til að vinna mótið. Það er ekki öllum gefið að vinna „eftir pöntun“ en það gerði hins vegar Torfi í úrslitaskák gegn Kristófer og tryggði sér þar með sigur á mótinu. Það varð svo Egill Gautur Steingrímsson sem tók verðlaunin fyrir bestan árangur út frá frammistöðustigum.
Önnur úrslit og lokastöðu má annars sjá hér.
Af heimasíðu TR.
