Magnus Carlsen hefur bætt enn einni rósinni í hnappagatið en hann varð í dag Heimsbikarmeistari í skák. Eftir næstum því mánuð af taflmennsku í Baku hefur norski snillingurinn bætt eiginlega eina stóra titlinum sem hann átti eftir við safnið…kannski er það bara Reykjavík Open næst?

Rennum yfir gang mála í dag.

Magnus Carlsen (2835) – Rameshbabu Pragganandhaa (2707)

Segja má að úrslitin hafi ráðist í fyrri bráðabanaskákinni. Pragga var með fína stöðu en tók kannski spennuna of snemma úr stöðunni í miðtaflinu. Smátt og smátt fór Carlsen að bæta stöðuna og hann nýtur sín oft vel í statískum stöðum og riddarar hans fóru að fá reiti í endataflinu. Carlsen hafði sigur í endataflinu.

Í seinni skákinni hafði Carlsen hvítt og beitti strategíu sem hann hafði notað áður á mótinu, hann tefldi 2.c3 Alapin afbrigðið gegn Sikileyjarvörninni. Magnus stýrði skákinni í auðvelt jafntefli og Pragga taldi sig ekki einu sinni hafa efni og áhöld til að reyna nokkuð þannig að hann bauð jafntefli í 22. leik.

Viðtal við sigurvegarann:

Fabiano Caruana(2782) – Nijat Abasov (2646)

Caruana náði að sýna styrkleikamuninn á þessum tveimur í bráðabananum. Fabi vann báðar skákirnar og tryggir sér bronsið. Abasov enn og aftur má vel við una, ein af stjörnum mótsins klárlega!

Skak.is þakkar lesendum fyrir að vera samferða í gegnum þetta mót, klárlega eitt af skemmtilegri mótum sem fram fara.

Útsending dagsins:

- Auglýsing -

TENGDAR GREINARFLEIRI FRÉTTIR