Sigur gegn Zambíu og tap gegn Indónesíu

Eftir

3. ágúst, 2022

1738

Íslenska sveitin í opnum flokki hafði sigur á Zambíu 3,5 – 0,5 í 6. umferð Ólympíumótsins. Stigalágir Zambíumenn höfðu vakið athygli á mótinu eftir sigur gegn sterkum sveitum Danmerkur og Egyptalands, fyrr í mótinu. Hjörvar Steinn fór fyrir liðinu og var fyrstur að landa vinningi eftir spennandi skák á 1. borði. Hannes Hlífar þurfti að sætta sig við jafntefli með svörtu mönnunum á 2. borði, eftir að hafa staðið vel framan af. Guðmundur hafði sigur á 3. borði eftir mikla baráttu og tryggði um leið sigurinn í viðureigninni. Helgi Áss innsiglaði svo fín úrslit með sigri með svörtu á 4. borði. Zambíumenn börðust eins og ljón og íslenska sveitin þurfti að hafa töluvert fyrir þessum stóra sigri.

Í kvennaflokki tapaði íslenska sveitin gegn þeirri indónesísku, 0-4. Framan af litu stöðurnar ágætlega út en eftir slæman afleik Lenku á 1. borði fór að halla mjög á íslenska liðið. Hallgerður Helga valdi ranga leikjaröð í byrjuninni og tapaði um síðir. Liss lenti einnig í vandræðum í miðtaflinu, náði ekki að losa sig undan pressunni á kóngsvæng, og tapaði. Jóhanna Björg tefldi vel og jafnaði taflið eftir byrjunina. Í framhaldinu barðist hún fyrir því að koma íslenska liðinu á blað en hafði því miður ekki erindi sem erfiði og 4-0 tap í viðureigninni staðreynd.

Að lokinni 6. umferð er íslenska sveitin í opnum flokki í 49. sæti en kvennaliðið í 80. sæti.
Á morgun, fimmtudaginn 4. ágúst, er frídagur á mótinu.
Andstæðingar Íslands í 7. umferð, sem fram fer föstudaginn 5. ágúst, verða Ekvador í opnum flokki og Tajikistan í kvennaflokki.

Lið Íslands í opnum flokki skipa eingöngu stórmeistarar