Atskákmót hjá TR í kvöld. Tefldar eru fimm skákir og tímamörkin eru 10 mínútur á skákina að viðbættum 5 sekúndum á hvern leik. Teflt er í einum flokki. Mótin eru öllum opin og reiknuð til alþjóðlegra atskákstiga. Teflt er í félagsheimili TR, Faxafeni 12 og taflmennskan hefst stundvíslega klukkan 19:30. Það þarf ekki að skrá sig fyrirfram, nóg að mæta á staðinn. Umsjón með mótunum hafa þeir Eiríkur K. Björnsson og Gauti Páll Jónsson. Þátttökugjald er 500kr. en frítt er fyrir 17 ára og yngri.
Veitt eru verðlaun, 3000 króna inneign í Skákbúðina, fyrir sigurvegara mótsins, og fyrir bestan árangur miðað við eigin stig (rating performance).
————-
Rétt tæplega 20 skákmenn skeyttu ekkert um veðurblíðu (svona sæmilega miðað við veturinn) né Meistaradeild í fótbolta og settust að tafli í TR síðastliðinn þriðjudag. Að þessu sinni tók skákstjóri þátt eins og gjarnan er, þegar stendur á stöku, og vann allar skákirnar fimm. Svo bar við að upp kom sama vörnin í öllum umferðum hjá honum; Kóngsindversk vörn. Tvær með hvítu og þrjár með svörtu, takk fyrir. Í öðru sæti varð Kristófer Orri Guðmundsson með fjóra vinninga en jafn honum að vinningum en lægri á stigum varð síðan Magnús Sigurðsson. Magnús varð hins vegar efstur á frammistöðustigum (að frátöldum þeim sem vann en sami aðili fær auðvitað aldrei bæði verðlaunin).
Þeir Eiríkur og Magnús Sigurðsson uppskera því úttektarverðlaunin hjá Skákbúðinni að þessu sinni og er skákstjóri þegar búinn að taka út sín verðlaun í formi afar athyglisverðra bóka. Þó enga um Kóngsindverska vörn…
Öll úrslit og stöðu mótsins má annars nálgast hér á chess-results.
