Lið Íslands í kvennaflokki vann sigur á Wales í 5. umferð Ólympíuskákmótsins í Chennai í Indlandi.
Liss Acevedo Mendez braut ísinn með öruggum sóknarsigri á 4. borði. Lenka Ptácniková hafði einnig sigur í vel útfærðri skák á 1. borði. Jóhanna Björg tapaði á 2. borði en Hallgerður Helga hafði að lokum sigur í sinni skák á 3. borði, með mikilli þolinmæði, og tryggði íslensku sveitinni 3-1 sigur í viðureigninni.

Lið Íslands í opnum flokki tapaði 1-3 gegn þéttri sveit Króatíu. Hjörvar Steinn Grétarsson og Helgi Áss Grétarsson töpuðu sínum skákum á 1. og 4. borði. Hannes Hlífar gerði tíðindalítið jafntefli á 2. borði. Guðmundur Kjartansson gerði heiðarlega tilraun til þess að leggja reynsluboltann Zdenko Kozul að velli á 3. borði í maraþonskák en hafði því miður ekki erindi sem erfiði og lauk skákinni með jafntefli að lokum.

Andstæðingar Íslands í 6. umferð, sem fram fer á morgun 3. ágúst, verða sveit Zambíu í opnum flokki og Indónesíu í kvennaflokki. Zambía hefur vakið athygli á mótinu með sigri gegn Dönum og Egyptum.

Lið Íslands í opnum flokki skipa eingöngu stórmeistarar

  1. Hjörvar Steinn Grétarsson
  2. Hannes Hlífar Stefánsson
  3. Guðmundur Kjartansson
  4. Helgi Áss Grétarsson
  5. Margeir Pétursson (jafnframt liðsstjóri)

Íslenska liðið er nr. 43 í styrkleiðaröð. Alls taka 188 lið þátt.

Kvennaliðið

  1. Lenka Ptácníková
  2. Jóhanna Björg Jóhannsdóttir
  3. Hallgerður Helga Þorsteinsdóttir
  4. Lisseth Acevedo Mendez
  5. Tinna Kristín Finnbogadóttir

Liðsstjóri er Ingvar Þór Jóhannesson

Íslenska liðið er nr. 61 í styrkleikaröð. Alls taka 162 lið þátt.

- Auglýsing -

TENGDAR GREINARFLEIRI FRÉTTIR