Íslensku liðin náðu frábærum úrslitum í áttundu umferð Ólympíuskákmótsins í Samarkand sem fram fór í dag. Í opna flokknum gerði liðið jafntefli við stórmeistarasveit Ítalíu en í kvennaflokki vannst ótrúlegur 3½–½ sigur gegn Mexíkó þrátt fyrir að þær væru stigahærri á öllum borðum! Þjóðverjar hrærðu upp í toppbaráttunni með því að vinna heimamenn, Úzbeka. Skemmtilegar lokaumferðir framundan!

Opinn flokkur: Ítalía – Ísland

Allir fjórir Ítalirnir eru stórmeistarar og voru Ítalirnir stigahærri á öllum borðum. Hannes kom inn fyrir Jóhann sem hvíldi í dag.

Borð Ítalía stig Ísland stig
1 GM Lorenzo Lodici 2573 GM Vignir Vatnar Stefánsson 2531
2 GM Luca Moroni 2556 IM Hilmir Freyr Heimisson 2342
3 GM Francesco Sonis 2539 GM Hannes Hlífar Stefánsson 2425
4 GM Sabino Brunello 2536 GM Guðmundur Kjartansson 2402

Viðureignin fór aldeilis ekki vel af stað því rétt var liðinn klukkutími af umferðinni þegar Hannes hafði leikið illa af sér og varð að gefast upp!

Þungt tap fyrir liðið svona snemma viðureignar og þurftu nú aðrir aldeilis að spýta í lófana!

Vignir hafði 5 af 7 fyrir skákina og tefldi djarft með svörtu gegn Lodici í Philidor vörn. Áhættan gekk vel upp og í miðtaflinu fékk Vignir betra tafl og komst í endatafl peði yfir. Mislitir biskupar voru þó á borðinu sem komu í veg fyrir frekari landvinninga Vignis sem varð að sættast á jafntefli.

Hilmir reyndi einnig sitt besta til að pressa og batt vonir sínar við valdað frípeð sitt á d-línunni. Svipað og hjá Vigni voru mislitir biskupar sem komu í veg fyrir frekar þróun á framgang d-peðsins og Hilmir varð líka að sætta sig við jafntefli í skák þar sem hann var sá að pressa, eins og Vignir.

Guðmundur hafði fínt tafl framan af en missti tökin í miðtaflinu og peðameirihluti svarts á drottningarvæng og vald á c-línunni setti stöðu Guðmundar algjörlega í kaðlana! Þegar neyðin var mest tók Guðmundur mikinn séns í stöðunni, var hróki undir en fékk hættulegt mótspil. Mótspilið skilaði sér eftir afleik í 44. leik, Gummi fann taktíkina og fékk unnið endatafl þar sem hann gerði engin mistök.

Mikill seiglusigur sem tryggði góð liðsúrslit og gaman að sjá Gumma koma svona sterkan inn, með sinn fjórða sigur í röð!
2-2 jafntefli hefði verið talin fín úrslit fyrirfram en miðað við hversu snemma liðið var 0-1 undir eru úrslitin framúrskarandi!

Næst á dagskrá er lið Japan, gamla góða sýnd veiði en ekki gefin en tækifæri á að komast í góð færi fyrir lokaumferðirnar. Ísland hefur 10 stig. En staða efstu þjóða er eftirfarandi:

Úzbekar áfram efstir en Þjóðverjar hristu upp í toppnum með því að leggja þá að velli. Þjóðverjar eru jafnir að vinningum en nokkuð á eftir í oddastigum. Þjóðverjar hafa þó þegar mætt Kínverjum, Bandaríkjamönnum og Úzbekum og ef þeir halda vel á spilunum í sínum viðureignum gætu þeir treyst á að Bandaríkjamenn nái t.d. stigi af Úzbekum. Fyrst þurfa þeir þó að lifa af viðureignina við Indverja!

Keymer hefur verið grjótharður á efsta borði og Frederik Svane hefur náð í lykilpunkta í stórum viðureignum og verið einn mikilvægasti liðsmaður þeirra. Leiðin að gullinu ætti þó enn að vera í höndu Úzbeka ef þeir ná að leggja Bandaríkjamenn að velli í næstu umferð, alvöru viðureign!

Kvennaflokkur: Mexíkó – Ísland

Mexíkó voru stigahærri á öllum borðum gegn íslenska liðinu þar sem Iðunn kom inn fyrir Hrund.

Borð Mexíkó stig Ísland stig
1 WIM Zenia Corrales Jiménez 2125 WGM Lenka Ptácníková 2082
2 WIM Tania Miranda Rodríguez 2041 WFM Hallgerður Helga Þorsteinsdóttir 1995
3 WCM Mia Fernanda Guzmán García 2007 WFM Guðrún Fanney Briem 1865
4 WCM Scarlett Daniela Olea Valle 1975 WCM Iðunn Helgadóttir 1869
Taflmennskan í þessari viðureign ásamt byrjanaundirbúningi og leikplani var algjörlega til fyrirmyndar, nánast allt gekk upp!
Lenka var fyrst að klára og hélt traustu jafntefli með svörtu mönnunum gegn stigahæstu skákkonu þeirra. Lenka hefur teflt traust í síðustu skákum og það er mjög mikilvægt fyrir liðið að halda fyrsta borðinu vel.
Þegar jafnteflið var í höfn voru íslensku stöðurnar, sérstaklega á öðru og fjórða borði, mjög vænlegar. Fannst liðsstjóra Íslands eilítið skrýtið að Corrales Jimenez skyldi ekki þæfa taflið aðeins til að sjá hvernig aðrar skákir þróuðust, engin áhætta var fólgin í því!

Iðunn tefldi vandaða skák á 4. borði og gjörsamlega pakkaði andstæðingi sínum saman. Fínn byrjanaundirbúningur þar sem enn reyndist vopnabúr vídeóa Vignis vel vandanum vaxið!

Iðunn fékk fína stöðu og eiginlega það góða að það var synd að gera eitthvað í stöðunni, pósamenn eins og Þorsteinn Þorsteinsson hefðu notið sín í botn í stöðunni og hert skrúfuna enn frekar áður en hefði verið látið til skarar skríða. Var það eini ljóðurinn á algjörri pökkun að sú mexíkóska átti einn séns til að fá unnið tafl en það er nánast ósanngjarnt að minnast á það þegar hún hafði haft tapað alla skákina!

Iðunn kláraði svo með „fréttablaðsfléttu“:

43.Hf8! og mát í næsta leik!

Iðunn var varla staðin upp þegar skák Guðrúnar kláraðist í miklu tímahraki. Þriðja borð Mexíkó lék sig í mát í einum leik! Guðrún hafði haft betra tafl lengst af í miðtaflinu en aldrei vinningsstöðu. Hún missti af einni vænlegri leið en var eiginlega búin að missa stöðuna í tvísýnt tafl í tímahrakinu þegar afleikurinn kom. Sigurinn þá þegar í höfn! Guðrún má vel við una með 6 vinninga af 8 og er að sýna að hrakfarir undanfarna mánuði áttu ekki rétt á sér.
Hér var aðeins skák Hallgerðar eftir. Ítalski leikurinn og Hallgerður tók yfirhöndina í miðtaflinu og setti pressu á svörtu stöðuna.

25.Rd3! var smekklegur hér og svartur er í vandræðum! Oft er erfitt að finna riddaraleiki afturábak en Hallgerður var klár í það. Mikið var þó eftir af skákinni en í kjölfarið vannst peð. Séns var á hraðari úrvinnslu en mikilvægast að sigurinn var aldrei í hættu. Þó er rannsóknarefni, og á það einhverra hluta vegna meira við í kvennaflokknum, hvað menn eru tregir til að gefast upp þó gjörsamlega öll nótt sé úti…og eiginlega verra þegar ekkert er upp á að keppa, viðureignin töpuð þá þegar.
Glæsilegur stórsigur gegn sveit sem er sterkari á pappír!

Stórsigurinn gefur liðinu byr undir báða vængi í baráttunni um gull í C-kategóríu en veitt eru flokkaverðlaun eftir styrkleika sem er raðað í miðað við upphafsstyrk sveita. Ísland er nú í öðru sæti á oddastigum þegar þrjár umferðir eru eftir!

Næst á dagskrá er erfið viðureign gegn Úzbekistan 2 sem eru með mjög sterkt lið en íslenska liðið er yfirfullt af sjálfstrausti eftir góðan sigur í dag!

Á toppnum sitja Kínverjar eftir sigur gegn Georgíu. Kazakar gerðu jafntefli við Indverja. Spennan þó nokkur í kvennaflokki eins og í þeim opna!

Ólympíu-tenglar!

- Auglýsing -

TENGDAR GREINARFLEIRI FRÉTTIR