Nemendur á öllum grunnskólaaldri að tafli á Miðgarðsmótinu 2020. Sterk skáksveit Foldaskóla teflir við E sveit Rimaskóla sem skipuð var 6 efnilegum 1. bekkjar strákum. E sveitin náði 7. sæti mótsins sem er athyglisverður árangur svo ungrar skáksveitar

Skákdeild Fjölnis í samstarfi við þjónustumiðstöina Miðgarð í Grafarvogi stóð í 16. sinn að skákmóti grunnskólanna í Grafarvogi, Miðgarðsmótinu sem haldið var í hátíðarsal Rimaskóla. Að þessu sinni tefldu 13 skáksveitir, skipaðar 6 liðsmönnum, alls um 80 nemendur á öllum grunnskólaaldri. Skákiðkun og skákkennsla er mismikil í grunnskólunum í Grafarvogi og styrkeliki sveitanna nokkuð eftir því.

Sigurvegarar Miðgarðsmótsins 2020 með glæsilega verðlaunagripi og SAM – bíómiða. Strákarnir sex eru allir bekkjarbræður í 9. bekk og hafa verið í fremstu röð grunnskólasveita frá því í 4. bekk.

Í Rimaskóla er einhver lengsta samfellda skákhefð allra skóla og þær 6 skáksveitir sem skólinn sendi til keppni að þessu sinni voru allar býsna sterkar. Dalskóla var boðið að taka þátt í Miðgarðsmótinu í fyrsta sinn og mætti skólinn með tvær jafnar og efnilegar sveitir. Skáksveit Foldaskóla hélt forystunni á mótinu fyrri helming mótsins en það snerist við í 4. umferð af 6 þegar Rimaskóli A sveit vann innbyrðis viðureign 4-2 og kláraði svo dæmið í framhaldi með nokkuð öruggum sigri.

Skákstjóri öll sextán árin. Helgi Árnason formaður skákdeildar Fjölnis mættur í “gallann”, nýjan æfingabúning Skákdeildar Fjölnis

Í lokaumferðinni áttust við Rimaskóli stúlknasveit og Rimaskóli B sveit þar sem síðarnefnda sveitin vann 5-1 sigur og sveitirnar skiptu um sæti. Foldaskóli og Rimaskóli C sveit deildu síðan með sér 4 – 5 sæti sem gáfu verðlaun.

Íslandsmeistarar grunnskóla í stúlknaflokki, stelpurnar í Rimaskóla skipa sterkustu stúlknaskáksveit landsins. Urðu í 3. sæti Miðgarðsmótsins

Þjónustumiðstöðin Miðgarður gaf verðlaunagripi og veitingar og Skákdeild Fjölnis veitti 30 keppendum í 5 efstu skáksveitunum SAM-bíómiða í verðlaun. Það er mikill skákáhugi í grunnskólum Grafarvogs þegar á reynir enda skákin skemmtileg. Skákstjórar voru þeir Helgi Árnason formaður skákdeildar Fjölnis og Ragnar Harðarson frá Miðgarði.

 

- Auglýsing -