Atskákmót hjá TR í kvöld. Tefldar eru fimm skákir og tímamörkin eru 10 mínútur á skákina að viðbættum 5 sekúndum á hvern leik. Teflt er í einum flokki. Mótin eru öllum opin og reiknuð til alþjóðlegra atskákstiga. Teflt er í félagsheimili TR, Faxafeni 12 og taflmennskan hefst stundvíslega klukkan 19:30. Það þarf ekki að skrá sig fyrirfram, nóg að mæta á staðinn. Umsjón með mótunum hafa þeir Eiríkur K. Björnsson og Gauti Páll Jónsson. Þátttökugjald er 500kr. en frítt er fyrir 17 ára og yngri.
Veitt eru verðlaun, 3000 króna inneign í Skákbúðina, fyrir sigurvegara mótsins, og fyrir bestan árangur miðað við eigin stig (rating performance).
—-
Mettþáttaka var á Þriðjudagsmóti TR þann 15. mars, en 30 manns mættu til leiks. Toppurinn var þéttur, en fyrir lokaumferðina voru átta skákmenn með þrjá vinninga og tveir skákmenn með tvo vinninga, þeir Daði Ómarsson og Ólafur B. Þórsson. Ólafur vann þá skák og tryggði sér því fyrsta sætið. Fimm skákmenn hlutu fjóra vinninga, Daði, Björgvin Ívarsson Schram, Gauti Páll Jónsson, Brynjar Bjarkason og Kristófer Orri Guðmundsson. Það var mjög lítið um jafntefli í mótinu, barist til síðasta blóðdropa! Eins og undanfarna þriðjudaga mættu nýliðar til leiks, og eru þeir oft stór hluti þáttakenda, í bland við reyndari skákmenn. Gaman að því!
Ólafur gaf Hjálmari Sigurvaldasyni bókaverðlaun sín í mótinu, en Hjálmar hefur margoft reynst stigahærri mönnum erfiður ljár í þúfu. Verðlaun fyrir bestan árangur miðað við stig fékk Guðlaugur Gauti Þorgilsson en hann er stigalaus. Það gæti þó breyst taki hann þátt í næsta móti, en það tekur oft ekki nema tvö mót til að menn komi inn á stigalista.
Úrslit og staða mótsins: chess-results
Af heimasíðu TR
