Mikill fjöldi Íslendinga er að tafli nú á ýmsum mótum víðsvegar um Evrópu. Flestir eru í Prag þar sem þriðja umferð á Prag Open fór fram í dag.
Tíu efstu borðin eru í beinum útsendingum en enginn Íslendingur var þar í dag. Það breytist hinsvegar í fjórðu umferðinni en þá verður Aleksandr Domalchuk-Jonasson væntanlega í beinni. Aleksandr er búinn að vinna allar þrjár skákir sínar en hann lagði írska skákmanninn Oisin O`cuilleanain (2130).
Hilmir Freyr Heimisson lagði FIDE meistarinn Frederick Licthfield (2197) og hefur 2,5 vinning.

Alexander Oliver Mai (2128) og Björn Hólm Birkisson (2121) unnu einnig sínar skákir og hafa 2 vinninga.
Jafntefli í sínum skákum gerðu þeir Bárður Örn Birkisson (2179), Davíð Kolka (1959) og Aron Þór Mai (2077). Jóhann H. Ragnarsson (1908) tapaði sinni skák.
- Heimasíða mótsins
- Chess-Results
- Beinar útsendingar (hefjast flestar kl. 13)
Stórmeistarinn Margeir Pétursson (2444) tekur þátt í Pula Open í Króatíu. Margeir var í góðum gír með 5,5 vinning úr fyrstu sjö umferðunum, unnið allar skákir sínar með hvítu en jafntefli með svörtu. Hin azerska Narmin Mammadova (2221) breytti því og sneri á Margeir í skák dagsins.

Níunda og síðasta umferðin hjá Margeiri er á morgun.
Dagana 23.-25. júní fer fram HSG-Open í Hollandi. Þeir Björn Þorfinnsson og Gauti Páll Jónsson tefla á þessu hraðmóti þar sem tefldar eru tvær skákir á dag.

Björn hóf leik á brösulegu jafntefli í fyrstu umferð gegn 72 ára 1900 stiga heimamanni en hefur spýtt í lófana og unnið þrjár skákir í röð og hefur 3,5 vinning af 4.
Skákir Björns (2. umferð var ekki í beinni)

Gauti Páll hefur 2 vinninga að loknum umferðunum fjórum. Gauti var í beinni í 2. umferð

Jóhann Hjartarson hóf leik á Dortmund Sparkassen Meeting í dag en mótinu lýkur 2. júlí. Jóhann mætti efnilegum Tyrkja, Taylan Ruzgar Ince (2240) fæddur 2007. Jóhann þurfti að lúta í dúk í dag en skák hans var ekki í beinni útsendingu.

Hannes Hlífar Stefánsson teflir á sterku opnu móti í Tenerife sem hefst á morgun og fer fram 25. júní – 2. júlí.
















