Síðari hluti Íslandsmóts skákfélaga hélt áfram í kvöld þegar 8. umferð úrvalsdeildarinnar fór fram. Fjölnismenn hafa unnið allar sínar viðureignir og viðureign þeirra við Taflfélag Reykjavíkur var nánast síðasta vígið. Fjölnismenn unnu sigur og hafa nú pálmann í höndunum og geta klárað dæmið gegn Víkingaklúbbnum á morgun.
TR – Fjölnir
Viðureignin varð sannarlega sviptingasöm og allt gat í raun gerst.
Á efsta borði tefldi landsliðsmaðurinn Guðmundur Kjartansson glimrandi skák og var að yfirspila andstæðing sinn glæsilega en missti þráðinn í flækjum í lokin og svartur náði að bjarga sér, þangað til…
Litháarnir hafa varla stigið feilspor hingað til fyrir Fjölni en hér missteig Pultinevicius sig. Hann þurfti að velja hvort hrókurinn færi á d8 en valdi vitlaust. 47…Hfd8 vinnur á svart en 47…Had8?? var afleikur og fölnaði Fjölnismaðurinn hratt þegar Gummi skellti 48.Hf1! á borðið!
Helgi Áss missti þráðinn á öðru borði eftir að hafa haft fína stöðu en Aleksandr Domalchuk-Jonasson stóð vaktina fyrir TR á þriðja borði og vann sína skák.
Sasha tefldi þéttingsfastan „pósa“ að vanda en hefði getað stytt sér vinnuna með skemmtilegu skoti.
36.c6! hefði verið flottur hér og svartur tapar liði.
Fjölnismenn bitu frá sér á borðum 5-7 þar sem þeir unnu allar skákinar.
Dagur vann flottan sigur á Þresti.
Vörnin orðin erfið eftir 28.Rxg5! og Dagur kláraði fína sóknarskák vel.
Sigurbjörn vann sigur gegn Ingvari eftir æsispennandi og taktíska skák í kóngsindverskri vörn. Allt í háalofti á köflum!
TG – TV
TG vann stóran sigur á sveit TV. Ekkert gekk upp hjá TV og aðeins tvö jafntefli komu í hús. Línurof Hannesar gegn Filip Boe segir kannski alla söguna um þessa umferð hjá Vestmannaeyingum.
38…He6 rífur valdið á c8 hróknum og hótar Dh1 með máti!
KR – Víkingaklúbburinn
KR-ingar bitu vel frá sér í viðureigninni við Víkingaklúbbinn. Vignir og Arnar unnu góða sigra gegn Jóhanni og Braga og Andrey Prudnikov náði að leggja Davíð Kjartansson að velli.
Nokkuð óvæntur sigur Frode Urkedal á þýska landsliðsmanninum Alexander Donchenko vóg hinsvegar þungt og drjúgur afli á neðri borðunum skilaði sigri með minnsta mun til Víkingaklúbbins. Víkingar halda í veika von um að ná í skottið á Fjölnismönnum en til þess að ná því verða þeir að leggja Fjölni og TR að velli og treysta á að Fjölnir missi niður fleiri viðureignir.
Staðan eftir 7 umferðir.
Mótið er í raun tvískipt, ljóst er hvaða klúbbar „ná sér í málm“ en aðrar sveitir eru meira og minna í fallbaráttu. Miðað við úrslit dagsins verður róðurinn líklega þungur hjá Vestmannaeyingum!
Í fyrramálið, er tefld 8. umferð í úrvalsdeild og jafnframt fara neðri deildir af stað. Spenna og skemmtilegheit framundan um helgina.
Myndaalbúm 7. umferðar – Hallfríður Sigurðardóttir
