Skákþáttur Morgunblaðsins

Óbeislað hugmyndaflug

Eftir

10. ágúst, 2024

982

Greinarhöfundur telur sig svona almennt séð hafa nokkuð góða yfirsýn yfir skáksöguna og merkar skákir fremstu meistara. En um daginn rakst ég á viðureign sem hafði farið fram hjá mér og mig rak eiginlega í rogastans eftir yfirferð. Óbeislað hugmyndaflug beggja var allsráðandi en að lokum var það bjartsýnin sem réð úrslitum. Bent Larsen og David Bronstein voru íslenskum skákáhugamönnum vel kunnir. Sá fyrrnefndi kom hingað fyrst til lands í ársbyrjun 1956 til að tefla um Norðurlandameistaratitilinn við Friðrik Ólafsson og margsinnis eftir það. David Bronstein tefldi hér fyrst á Reykjavíkurskákmótinu 1974 og var býsna tíður gestur hér á árunum í kringum 1990. Skákferill beggja er skákáhugamönnum vel kunnur.

Þeir voru í stórum hlutverkum á millisvæðamótinu í Amsterdam fyrir 60 árum en þar varð Larsen í efsta sæti ásamt Tal, Spasskí og Smyslov. Þá hófst ferill hans sem sigursælasti mótaskákmaður heims og árið 1967 var hann fyrsti handhafi „Skák-Óskarsins“. Í Amsterdam áttu sovésku keppendurnir í harðri innbyrðis samkeppni því að reglur FIDE þá gerðu ráð fyrir því að einungis þrír keppendur frá sömu þjóð kæmust áfram í áskorendaeinvígin. Larsen vann Bronstein í æsispennandi viðureign og í skýringum sínum lét hann í veðri vaka að gamlir draugar hefðu birst Bronstein þegar spennan var í hámarki; Bronstein hefði aldrei jafnað sig á tapinu fyrir Filippseyingnum Cardoso í lokaumferð millisvæðamótsins í Portoroz 1958 og því fór sem fór. En kannski hefur skákin sem hér er tekin til meðferðar líka haft sitt að segja:

Alþjóðlega mótið í Moskvu 1962:

Bent Larsen – David Bronstein

Sikileyjarvörn

1. e4 c5 2. Rf3 d6 3. Bb5+ Rc6 4. 0-0 Bg4 5. h3 Bxf3 6. Dxf3 e6 7. d3 Rge7 8. Bg5 Dd7 9. c3 a6 10. Ba4 Rg6 11. Rd2 b5 12. Bc2 Be7 13. Be3 0-0 14. Dh5 d5 15. exd5 exd5 16. d4 c4 17. f4 Hfe8 18. Rf3 f6 19. Bf5 Dd6 20. Bxg6 hxg6 21. Dxg6 Bf8 22. Hae1 He4 23. Bd2 Re7 24. Dg4 g6 25. h4 Bh6 26. h5 f5 27. Dh4

Larsen var ekki mikið fyrir að þræða vinsælar byrjanir en hér er komin fram staða þar sem hann er peði yfir. Hrókur svarts á e4 tryggir þó ríflegar bætur.

27. … g5!