Skákþáttur Morgunblaðsins

Metfjöldi íslenskra þátttakenda á EM ungmenna í Prag

Eftir

31. ágúst, 2024

233

Það er óhætt að fullyrða að Íslendingar hafi aldrei áður sent jafnmarga keppendur til leiks eins og nú gerist á EM ungmenna sem fram fer í Prag í Tékklandi. Í hinum ýmsu aldursflokkum pilta og stúlkna frá 8 til 18 ára eigum við 23 keppendur. Þau eru: Miroslava Skibina (8), Katrín Ósk Tómasdóttir (10), Halldóra Jónsdóttir (12), Emilía Embla Berglindardóttir (12), Guðrún Fanney Briem (14), Katrín María Jónsdóttir (16), Iðunn Helgadóttir (18), Haukur Leósson (10), Pétur Úlfar Ernisson (10), Karma Halldórsson (10), Örvar Hólm Brynjarsson (12), Birkir Hallmundarson (12), Tristan Fannar Jónsson (12), Jósef Omarsson (14), Sigurður Páll Guðnýjarson (14), Theodór Eiríksson (14), Mikael Bjarki Heiðarsson (16), Markús Orri Óskarsson (16), Markús Orri Jóhannsson (16), Benedikt Þórisson (18), Adam Omarsson (18), Gunnar Erik Guðmundsson (18) og Sigurbjörn Hermannsson (18).

Peð eru líka sóknarmenn

Orðatiltækið kallast á við tilvitnun úr frægu riti besta skákmanns 18. aldar, Francois-Andrés Danicans Philidors: Peðin eru sál skákarinnar. Sumir hafa haldið því fram að setninguna eina sér hafi mátt lesa sem hvatningu til uppreisnar. Þau urðu örlög franska aðalmannsins, sem var ekki síður frægur fyrir tónsmíðar sínar, að eftir frönsku stjórnarbyltinguna 1789 flúði hann frá París til London þar sem hann lést árið 1795. Mér er til efs að Philidor hafi í riti sínu hvatt lesendur sína til að fylkja peðunum fram á vígvellinum án tillits til stöðu léttu mannanna og „þungu fallstykkjanna“. Í viðureignum fremstu meistara finnast fá dæmi þess að eftir t.d. 12 leiki hafi öllum peðum, hvíts eða svarts, verið leikið fram, sumum oftar en einu sinni. Þetta gerðist þó í skák Nepomniachtchis og Giris sem fram fór í kappskákhluta Sinquefield-mótsins í St. Louis sem nú stendur yfir. Það er ekki auðvelt að raska ró besta skákmanns Hollands en það tókst að þessu sinni.

Sinquefield-mótið í St. Louis; 3. umferð:

Jan Nepomniachtchi – Anish Giri

Nimzo-indversk vörn

1. d4 Rf6 2. c4 e6 3. Rc3 Bb4 4. e3 0-0 5. a3 Bxc3+ 6. bxc3 d6 7. f3 Rc6 8. e4 De8 9. h4!?

Með þessum leik byrjar ballið.

9. … b6 10. h5 Ba6 11. Ha2 Ra5 12. g4

Sjá stöðumynd 1