Heimsmótið í netskák: Góður sigur í 1. umferð og Úkraína í 2. umferð!

Heimsmótið í netskák hófst um síðastliðna helgi þegar Team Iceland mætti sterku liði frá Serbíu. Liðin höfðu mæst áður og hafði lið Íslands ávallt haft betur í þeim viðureignum. Lið Serbíu er engu að síður gríðarlega öflugt og má m.a. nefna að liðið vann allar viðureignir í deildinni á fyrsta keppnistímabili mótsins.

Lið Íslands var afar vel skipað og var ánægjulegt að sjá að liðinu hefur borist verulegur liðsstyrkur fyrir þetta tímabil. Liðið var mjög þétt, allt frá efsta borði og niður á það neðsta og gáfu neðri borðin ekkert eftir í fjölda vinninga.

Teflt var eftir nýju fyrirkomulagi, en fyrst var tefld leifturskák, því næst hraðskák og að lokum slembiskák. Lið Íslands vann allar þrjár viðureignirnar og nældi sér því í þrjú stig af þremur mögulegum í 1. umferð mótsins. Ágætis byrjun á tímabilinu.

Ísland hafði mikla yfirburði í leiftur- og hraðskákinni, en slembiskákin var örlítið jafnari, en sigurinn þar var þó aldrei í hættu, enda héldum við alltaf 4-6 vinninga forskoti.

Fóru leikar því þannig:

• Leifturskák: Ísland 46 – 30 Serbía
• Hraðskák: Ísland 61.5 – 28.5 Serbía
• Slembiskák: Ísland 33 – 29 Serbía

FM Ingvar Þór Jóhannesson (www.twitch.tv/zibbit64) fór yfir málin í gríðarlega vandaðri útsendingu og greindi skákir og gang mála eins og honum einum er lagið. Það er því alveg þess virði að fara á Twitch rás (slóð að ofan) Ingvars og smella á „follow“.

Hér að neðan má renna yfir útsendinguna og bent er á að öllum viðureignum liðsins verður sjónvarpað með sama hætti. Ingvar tók einnig saman afar skemmtilega grein um viðureignina sem er aðgengileg hér að neðan!

• Team-iceland-beats-srbija-tim-in-lcwl-division-1

• Öll úrslit Team Iceland
• Staðan í 1. deild

2. umferð – Úkraína!

2. umferð Heimsmótsins í netskák fer fram sunnudaginn 21. júlí og hefst viðureignin kl. 18:30.

Andstæðingar umferðarinnar verða meistararnir sjálfir frá Úkraínínu!

Lið Úkraínu þarf tæplega að kynna sérstaklega, en þeir eru með gríðarlega fjölmennt og sterkt lið og hafa m.a. teflt fram mönnum eins og Ruslan Ponomariov og Pavel Eljanov ásamt fjöldanum öllum af öðrum mjög sterkum meisturum. Styrkur þeirra liggur þó ekki endilega í efstu borðunum, heldur býr liðið yfir gríðarlegri breidd og getur stillt upp mörghundruð manna liði ef svo ber undir. Það gerðu þeir einmitt í úrslitakeppninni á síðasta tímabili, en þar tefldu Úkraínumenn við Rússa á 242 borðum! og voru Úkraínumenn samt með menn á bekknum.

Við þurfum því á öllum okkar liðsmönnum að halda í þessari viðureign. Eitt er víst að allir sem vilja komast að og er því tilvalið fyrir nýliða að mæta í þessa viðureign og sjá hvernig svona keppni fer fram.

Fyrri viðureignir liðanna

Ísland v. Úkraína – 9 umferð (úrslit)

Ísland v. Úkraína – 3. umferð

Beinar útsendingar

Chess.com leggur áherslu á að allar viðureignir mótsins verði sendar út í beinni útsendingu. FM Ingvar Þór Jóhannesson mun sjónvarpa viðureignum liðsins á Twitch rásinni twitch.tv/zibbit64 í samstarfi við Chess.com. Fögnum við því mjög, enda fer þar maður með gríðarlega reynslu af slíkum útsendingum. Gott væri að allir færu á slóðina að ofan og smelltu á “follow”.

Dagskráin á sunnudaginn

• 18:30 Leifturskák 1|1 – https://www.chess.com/live#tm=3625
• 18:50 Hraðskák 5|2 – https://www.chess.com/live#tm=3626
• 19:30 Slembiskák 10|2 – https://www.chess.com/live#tm=3627

Tefldar verða þrjár viðureignir við andstæðinga hverrar umferðar. Stigagjöfin er þannig að eitt stig er fyrir sigur í hverri viðureign (hálft fyrir jafntefli) og er því alls hægt að vinna þrjú stig. Það væri því mjög gott ef allir tefldu allar þrjár viðureignirnar, en það er aldrei krafa, þeir sem vilja ekki tefla leifturskák eða slembiskák (t.d.) geta einfaldlega sleppt því.

NÝLIÐAR VELKOMNIR!

Nýliðar eru sérstaklega velkomnir og það eina sem þeir þurfa að gera er að fara á síðu liðsins á chess.com og smella á join. Allir geta tekið þátt!

https://www.chess.com/club/team-iceland

VERÐLAUN

Chess.com leggur til verðlaun í formi demants áskrifta ( efstu þrjú lið í 1. deild). Þeir sem taka oftast þátt eiga því ágæta möguleika á að vinna til verðlauna.

NÆSTU VIÐUREIGNIR (ÁÆTLUN)

TENGLAR

• Facebook síða Team Iceland
• Síða LCWL hjá Chess.com – Þar verða fréttir og upplýsingar um keppnina
• Beinar útsendingar – FM Ingvar Þór Jóhannesson verður með beinar útsendingar frá viðureignum Íslands!