Einn efstur Pragnanandhaa ásamt móður sinni með verðlaunagripinn. — Ljósmynd/Þorsteinn Magnússon

Þegar skammt var til loka síðasta Reykjavíkurskákmóts lá ljóst fyrir að Héðinn Steingrímsson, Jóhann Hjartarson og Hjörvar Steinn Grétarsson væru líklegastir íslensku keppendanna til ná einu af efstu sætunum og þegar upp var staðið komst Hjörvar Steinn í 2. – 5. sæti með 7 vinninga af 9 mögulegum. Hann sigldi fremur lygnan sjóð, tók yfirsetu snemma móts, en nýtti færin vel í tveim síðustu skákum sínum sem hann vann. Héðinn og Jóhann höfðu meira fyrir hlutunum en þeir tefldu nokkrar langar og strembnar skákir og misstu báðir af tækifærum til að ná enn betri árangri.

Héðinn tefldi við sigurvegarann, sem síðar varð, í 5. umferð. Þetta var ein athyglisverðasta baráttuskák mótsins og sýnir að ekki skortir Indverjann hugmyndir í byrjun tafls. Pragnanandhaa virðist vera laginn við það að koma andstæðingnum út úr þægindrammanum eins fljótt og auðið er:

Kviku Reykjavíkurskákmótið 2022; 5. umferð:

Héðinn Steingrímsson – R Praggnanandhaa

Nimzo-indversk vörn

1. d4 Rf6 2. c4 e6 3. Rc3 Bb4 4. Dc2 O-O 5. a3 Bxc3 6. Dxc3 d6 7. f3 b6 8. e4 c5 9. d5 b5 10. dxe6 Bxe6 11. cxb5 Rbd7 12. Re2 d5 13. Rf4 He8 14. Bd2 dxe4 15. Rxe6 Hxe6 16. Bc4

16. … exf3 17. Bxe6 f2+!

Snjall millileikur því kóngurinn má ekki snerta peðið vegna 18. … Re4+ og drottningin fellur.

18. Ke2?

 

 

 

Öruggara og betra var 18. Kf1.

18. … fxe6 19. Bg5

Þegar þessi staða birtist á skjánum virtist mér í fljótu bragði að leikurinn sem Praggnanandhaa valdi hlyti að vera sá besti í stöðunni því að drottningin horfir til beggja átta. En „vélarnar“ voru á öðru máli!

19. … De8!?

Besti leikurinn að mati „Stockfish“ er dálítið óvæntur, 19. … Db8! Hvítur virðist þó geta varist með 20. Bxf6 Rxf6 21. Dxc5 Df4 22. Dxf2.

20. Bxf6 Rxf6 21. Dc4 Hd8 22. Kxf2 Hd2+?!

24. … Hd4! gaf betri möguleika. Eftir 23. De2 Hd2! 24. Dxd2 Re4+ 25. Ke3 Rxd2 26. Kxd2 Dxb5 er drottningin sterk á opnu svæði en hvítur ætti að geta varist með 27. Hab1.

23. Kg1 Da8 24. Dxe6 Kh8

25. Dc6!

Besti varnarleikurinn. Hættan er liðin hjá.

25. … Dd8 26. h3 Dd4+ 27. Kh2 De5+ 28. Kg1 h6 29. Hf1 Dd4+ 30. Kh2 De5+ 31. Kg1 De3+ 32. Kh2 De5+ 33. Kg1 Dd4+

– jafntefli samið vegna þráteflis.

Nokkur orð um framkvæmd mótsins og vettvang þess. Harpa er perla í miðbæ Reykjavíkur en gallar hennar sem keppnisstaðar liggja í augum uppi; á engum tímapunkti gátu keppendur haft tryggingu fyrir því að ekki myndi brjótast út hljómkviða mikil nánast fyrirvaralaust. Það gerðist nokkrum sinnum og hin slæma „hljóðvist“ fælir marga góða skákmenn frá þátttöku. Mótið er líka of stutt miðað við u.þ.b. 250 keppendur sem þýðir að úrslitaskákirnar verða of fáar. Gríðarlegur stigamunur kemur fram á andstæðingum efstu manna, Mads Andersen frá Danmörku tefldi við einn skákmann yfir 2500 elo-stigum svo dæmi sé tekið en Jóhann Hjartarson við fjóra. Að gefa kost á þremur yfirsetum dregur úr alvöru mótsins. Ein yfirseta ætti að vera kappnóg. Keppnisdagarnir voru sjö talsins – umferðirnar níu og enginn frídagur. Þetta er of stíft prógramm og bendir til þess að mótshaldið sé alfarið á forsendum mótshaldarans og að hér vanti samtal um aðstæður milli bestu skákmanna þjóðarinnar og stjórnar SÍ.

Skákþættir Morgunblaðsins birtast á Skák.is viku síðar en í blaðinu sjálfu. Þessi skákþáttur birtist 16. apríl 2022.

- Auglýsing -